1,209 Бардыгы /

ЖАЛАЛ-АБАД. Жалал-Абад облусундагы кооптуу аймактарда жашаган үй-бүлөлөрдү көчүрүү аракети күчөтүлөт. Бул багытта областтык Жарандык коргонуунун көчүрүү комиссиясы жыйын өткөрдү. Ага облус башчысынын орун басары Ырысбек Ызабеков жана тийиштүү тармактардын кызматкерлери катышып, бир катар чечимдерди кабыл алды.

Бүгүнкү күнгө чейин облус боюнча 1286 үй-бүлөнүн кооптуу жайларда жашагандыгы аныкталган. Алардын ичинен 942сине жер тилкелери берилип, мамлекеттик ссудаларды алышкан. Бирок, бүгүнкү күнгө чейин көрсөтүлгөн жардам жана эскертүүлөргө карабай кооптуу аймактарда жашап келүүдө.

2020-жылы жүргүзүлгөн иш аракеттердин натыйжасында 185 үй-бүлө көчүрүлгөн. Аталган жайларда жашагандардын басымдуу бөлүгү Сузак районуна туура келет. Анда 642 үй-бүлө бар. Бул көрсөткүч Базар-Коргон районунда 291, Аксы районунда 142, Майлуу-Суу шаары 100, Жалал-Абад шаарыда 82, Ноокен районунда 17, Кара-Көл шаарында 12. Тилкелерде жер көчкү коркунучу жогору. Мындан сырткары сел, суу ташкындары, жер эрозиясы, таш кулоо, кыртыш сууларынын көтөрүлүү кооптуулугу да бар. Өткөн жылы эскертүүлөргө баш ийбеген 36 үй-бүлөнүн материалдары сот органдарына өткөрүлүп берилген.

Жыйында жаз-жай айларында кооптуулук дагы да жогору болоору айтылды. Адам өмүрүн сактап, материалдык чыгымдарды болтурбоо үчүн алдын алуу чараларын күчөтүү тапшырмасы берилди. Бул багытта комиссия мүчөлөрү жана жергиликтүү бийлик жетекчилерине жеткиликтүү түшүндүрүү иштерин алып баруу милдеттендирилди. 

“АЙМАК”