753 Бардыгы /

Швеция соту 4-февралда Өзбекстандын мурдагы президентинин кызы Гүлнара Каримовага пара берүүгө айыпталган Telia (мурдагы аталышы Teliasonera – Ред.) компаниясынын жетекчилерин актаган өкүмдү күчүндө калтырганы белгилүү болду.

Бул тууралуу Уюшкан кылмыштуулукту жана коррупцияны иликтөө борбору (OCCRP) маалымдады.

Компаниянын мурдагы үч жетекчиси Өзбекстандын телекоммуникациялык рыногуна кирүү үчүн Гүлнара Каримованын оффшордогу компанияларына пара иретинде 320 миллион доллар которууга шектелип жаткан.

2019-жылы февралда Стокгольм соту аларды актаган өкүм чыгарган. Сот «Telia компаниясынын мурдагы жетекчилери техникалык жактан Каримовага пара берген эмес» деп тапкан. Дал ушул укуктук чектөөнүн негизинде сот мурдагы өкүмдү күчүндө калтырды.

2019-жылы мартта Швеция прокуратурасы Стокгольм сотунун өкүмүнө каршы доо арыз жазган.

Прокуратура оффшордук компаниялардын эсебине акча которуу да пара катары эсептелерин далилдөөгө аракет жасоодо. Соттун комментарийинде болсо башка өлкөнүн мамлекеттик кызматкерине акча же башка материалдык баалуу буюмдарды берүү гана коррупция болуп эсептелери жазылган. Айыптоочу пара берилген маалда Гүлнара Каримова телекоммуникация тармагында жетиштүү ыйгарым укуктарга ээ расмий өкүл болгонун далилдей алган эмес.

Эми Швециянын Башкы прокуратурасы Жогорку сотко кайрылууга укугу бар.

Гүлнара Каримова Ташкент облусундагы түрмөдө отурат. Ага «Опузалап мүлктү менчиктеп алуу», «Ыксыз сарптоо», «Кылмыш жолу менен табылган кирешелерди адалдоо» беренелери менен айыптар коюлган жана ал 2020-жылдын 18-мартында 13 жыл төрт айга эркинен ажыратылган.

WWW