1,044 Бардыгы /

Оппозициячы Алексей Навальныйдын кармалышына байланыштуу Европа Биримдиги (ЕБ) Орусияга каршы жаңы санкцияларды киргизиши мүмкүн. Бул тууралуу ЕБдин тышкы саясат мекемесинин башчысы Жозеп Боррель Москвага жасаган сапарынан кийин билдирди.

Анын айтымында, жаңы чектөөлөр үчүн жакында эле жактырылган механизм колдонулушу мүмкүн. Анда адам укуктарын бузгандарга карата сакцияларды киргизүү чарасы каралган.

Боррель Орусиянын тышкы иштер министри Сергей Лавров менен жолукканда кезектеги жолу Навальный тез арада бошотулушу керектигин айтканын билдирди. Анын айтымында, Орусия адам укуктары боюнча эл аралык милдеттенмелерин аткарышы зарыл.

Өз билдирүүсүндө Боррель анын Москвага жасаган сапарынын фонунда европалык үч дипломат өлкөдөн чыгарылганын белгиледи. «Министр Лавров менен болгон жолугушум Европа менен Орусия бири-биринен алыстап жатканын көрсөттү», — деди Боррель.

Ал мындан тышкары жолугушуунун жүрүшүндө пандемияга каршы биргеликте аракет кылуу, климаттык кризис жана Иран менен өзөктүк келишимдин алкагында кызматташуу маселелери талкууланганын кошумчалады.

Орусиянын Тышкы иштер министрлиги Боррелдин бул билдирүүсү Москвадагы маалымат жыйынында айткандарынан кыйла айырмалана турганын билдирди.

Жозеп Боррелдин Москвадагы сапары 4-6-февраль күндөрү болгон.

2-февралда Москва соту 2014-жылы Алексей Навальныйга карата «Иш Роше» иши боюнча чыгарылган шарттуу жазаны 3,5 жылга камакка алуу жазасына алмаштырган. Оппозициячы буга чейин бир нече ай үй камагында болгондуктан, 2,5 жыл түрмөдө болот.

Апелляциялык арыз каралганга чейин Навальный тергөө абагында кармалат. Ал өзүнө карата сот өкүмү саясий негиздер менен чыгарылды деп эсептөөдө.

WWW