1,380 Бардыгы /

11-февралга караган түнү Ташкент облусунун Жаңы Ангрен жылуулук электр станциясында өрт чыкты. Станциянын жумушчуларынын билдиришинче, бул жолу кырсык 4-энергоблокто катталган. Окуя болгон жерде жумушчулар болгон эмес, өрт тез өчүрүлгөн.

Жумушчулар өрт от казан ысып кеткенден улам пайда болгонун билдиришүүдө.

– Бул казандар өткөн кылымдын 80-жылдарында орнотулган, алар эскирди. Казак көмүрү салыштырмалуу катуу күйгөндүктөн казандар ысып кетип жатат. Анын натыйжасында казандын тегерегинде орнотулган бункердеги көмүр ысып кетип, ис чыгууда. Станцияда иштөө өтө кооптуу болуп калды», – деди жумушчулардын бири.

20-январда Жаңы-Ангрен ЖЭБинин 5-энергоблогунда профилактикалык иштер жүрүп жаткан маалда жарылуу болуп, үч жумушчу көз жумуп, дагы үч киши жаракат алган. Компания кырсыкка жумушчулардын коопсуздук эрежелерин сактабаганы себеп болгонун билдирген. Ангрен шаардык прокуратурасы «Адам өлүмүнө жана башка оор кесепеттерге алып келген эмгекти коргоо эрежелерин бузуу» беренеси менен кылмыш ишин козгогон.

Былтыр январдын аягында станциянын №3 жана №4 энергоблокторунун чатыры күйүп кеткен. Анда эч ким жаракат алган эмес.

WWW