1,272 Бардыгы /

ЖАЛАЛ-АБАД. Жалал-Абад облусунун Ала-Бука районунун чек арага канатташ аймактарынын тургундары Кош-Болот, Кара-Белес жана Кок-Серек жерлеринде мамлекеттик чек ара сызыгынын өтүшүнө макул эместигин билдиришүүдө. Бул тууралуу УКМКнин Чек ара кызматынын коомчулук жана ЖМК менен байланыш түзүү бөлүмү билдирди.

Маалыматка ылайык, Ала-Бука районунун Кош-Болот, Кара-Белес жана Кок-Серек жерлеринде делимитацияланган мамлекеттик чек ара 2017-жылдын 5-сентябрындагы Кыргыз-өзбек мамлекеттик чек арасы жөнүндө эки өлкөнүн келишимине жана 2017-жылдын 2-октябрында ратификацияланган №173 Мыйзамга ылайык аныкталган.

Аталган тилкелерде жагдай курчуп кетпеши үчүн Кыргызстандын Ала-Бука тилкеси боюнча чек ара өкүлү Өзбекстандын Пунган багыты боюнча чек ара өкүлү менен сүйлөшүүлөрдү жүргүздү. Анын жыйынтыгында Кыргыз Республикасынын чек арага канатташ аймактын тургундары арасында түшүндүрүү иштерин алып баруу үчүн Өзбекстандын аймагында өзбек тарап жүргүзүп жаткан геологиялык чалгындоо иштери убактылуу токтотулган.

Учурда кыргыз-өзбек мамлекеттик чек ара тилкесинде абал туруктуу.

“АЙМАК”