870 Бардыгы /

ОШ. Ноокатта кримтөбөл «Иси» үй абагына чыгарылып, ал эми шериги бир айга камакка алынды. Бул жөнүндө Ош облустук сотунан маалымдашты.

Айтмакчы, шектүүлөрдүн баш коргоо чарасы адегенде Ноокат райондук сотунда каралган. Ош облустук ички иштер башкармалыгынын басма сөз кызматынын жетекчиси Жеңиш Ашырбаев Ноокат райондук милдициясынын тергөө кызматы кылмышка кңмөндүүлөрдү камакка алуу өтүнүчү менен сотко кайрылгандыгын кошумчалады.

Ошентип, үстүбүздөгү жылдын 8-февраль күнү Ноокат районунун Беш-Коргон айылынын 1979-жылы туулган тургуну А.Р. милицияга кайрылып, М. жана И. аттуу адамдар коркутуп, андан 40 миң сом акча талап кылып жаткандыгына даттанган. Аталган арызга ылайык Ноокат райондук ички иштер бөлүмү Жазык Кодексинин 203-беренеси (Опузалап акча талап кылуу) боюнча сотко чейинки өндүрүш иши баштаган. Бул иштин алкагында жогорудагы эки адам 14 миң сом акча алып жаткан жеринде Ноокат райондук ички иштер бөлүмүнүн кызматкерлери жана Ички иштер министрлигинин «Шумкар» атайын багыттагы отрядынын кызматкерлери тарабынан кармалып, тергөө кызматына өткөрүлүп берилди.

Кармалгандардын бири Ноокат районунун Көк-Бел айылынын 37 жаштагы тургуну, уюшулган кылмыштуу топко катышы бар адам катары Ички иштер министрлигинин атайын каттоосунда турган К.И.С. экендиги такталды. Ал 2014-жылы декабрь айында каракчылык фактысы менен кармалып, Ош облустук соту тарабынан тогуз жылга эркинен ажыратылган эле. 2019-жылы октябрь айында Ош шаарындагы №42 түзөтүү мекемесинде 3 жылга эркинен ажыратылып, ошол жерде мөөнөтүн өтөп жаткан.

Ал эми экинчи шектүү Ноокат районунун Чечме-Сай айылынын 33 жаштагы тургуну И.М.Р. Бул жаран 2020-жылдын декабрь айында Жазык кодексинин 267-беренеси (маңзат каражаттарын, психотроптук заттарды, алардын аналогдорун сатып өткөрүү максатында мыйзамсыз даярдоо) менен Ош шаардык соту тарабынан соттолуп, эки жылга пробациялык мөөнөтүн өтөп жаткан.

Алишер ТОКСОНБАЕВ “АЙМАК”