1,305 Бардыгы /

16-февралда Ташкент облусунун Уртачирчик районундагы кластер катары кайра түзүлгөн мурдагы «Карасув Пахта Тозалаш» заводунун 200дөн ашык жумушчусу айлык акыларынын убагында төлөнбөгөнүнө нааразылык билдирип, иш ташташты.

«Ноябрдын айлыгын декабрда экиге бөлүп төлөп беришкен. Ошол бойдон айлык ала элекпиз. Биз нааразылыгыбызды билдиргенден кийин жетекчилик алгач маяналар 5-февралда, андан кийин 15-февралда берилет деп убадалашкан. Бирок айлык которулбагандыктан 16-февраль күнү эртең менен иш таштадык», — деди жумушчулардын бири.

Ал заводдо иштеген 240 жумушчунун баары иш таштаганын кошумчалады.

«Мындай көрүнүш завод кластер болуп түзүлгөндөн бери уланып келет. Жетекчилер «иштегиңер келбесе иштебей эле койгула» деп айтып жатышат. Биз иш таштагандан бери завод эки күндөн бери иштебей турат», — деди дагы бир жумушчу.

«Карасув Пахта Тозалаш» заводуна ээлик кылган «Real Tex Tashkent» компаниясынын кызмат адамдары айлыктарды төлөөгө акча жок болгондуктан, банктан насыя алууга аракет кылып жатышканын билдиришти. Алардын айтымында, азырынча насыя качан берилери белгисиз.

Өзбекстанда 2019-жылы мартта 50дөн ашык пахта тазалоо заводу кластер кылып кайра түзүлгөн. Анда бийлик бул чечимин «реформаларды күчөтүү, базар мамилелерин киргизүү, ошондой эле пахта кайра иштетүү жана текстил өнөр жайларынын интеграциясын кеңейтүү» максаты менен түшүндүргөн.

Өзбекстандын мыйзамдарында «тыюу салынган иш таштоо» түшүнүгү бар, ошол эле маалда анда «мыйзамдуу иш таштоо» кандай болору көрсөтүлгөн эмес. Кылмыш кодекстин 218-беренесинде «тыюу салынган иш таштоо уюштуруу үчүн» 50дөн 100гө чейинки минималдык айлык акы өлчөмүндө айып пул төлөө же беш жылга эркинен ажыратуу жазасы каралган.

WWW