948 Бардыгы /

24-февралда сот актыларына жана мамлекеттик органдардын чечимдерине нааразы болгон 40ка жакын киши Нур-Султандагы президенттик администрациянын (Акордо имараты) алдына чогулду.

Алар чечимдерди кайрадан карап чыгуу боюнча мекемелер аралык комиссия түзүүнү талап кылышты.

Алматы облусунун Капшагай шаарынан келген Дауытбек Молдабаев аттуу жарандын айтымында, алар буга чейин президенттик администрациянын жетекчиси Ерлан Конашовго жеке кат түрүндө кайрылып, аларды 24-февралда кабыл алуусун өтүнүшкөн.

— Администрациядан жооп болгон жок. Ага чейин Башкы прокуратурага, Жогорку сотко да кайрылганбыз, бирок маселебиз чечилген эмес. Колубуздагы далилдерди эске албай жатышат. Аларга болгон ишеничибиз түгөнгөндөн кийин бул жерге келдик. Курамына Башкы прокуратура менен Жогорку соттун өкүлдөрүнөн тышкары мыйзамдарды реформалоо боюнча мажилис жана сенат комитеттеринин мүчөлөрү жана укук коргоо кызматкерлери да кирген мекемелер аралык комиссия түзүүнү талап кылып жатабыз», — деди Молдабаев.

Чыгыш Казакстан облусундагы Семей шаарынын тургуну Бахыткүл Манкиева күйөөсүнө карата чыккан сот чечимине нааразы экенин билдирди. Анын айтымында, жолдошунун күнөөсү жок экенин «эки экспертиза ырастаганына карабастан», Аскердик прокуратура аларды көңүлүнө албай келет.

Чогулган жарандардын президенттик администрацияга кирип чыккан бир нече өкүлү аларга мекемелер аралык комиссия түзүүнүн зарылдыгы жок экенин айтып, мамлекеттик органдарга жеке кайрылууларды жазууну сунушташканын билдиришти.

Бирок митинг катышуучулары Казакстанда алар кайрылбаган мамлекеттик орган калбаганын белгилеп, айрымдары демократиялык мамлекеттердин лидерлери менен Европа парламентинин депутаттарына кайрылуу гана жолу калганын айтышты.

Сот чечимдерине нааразы болгон жарандар тобу акыркы бир нече жылдан бери Алматы жана Нур-Султан шаарларында акцияларды өткөрүп, бийликтеги «Нур Отан» партиясынын имаратына барып, өлкө жетекчилитигине жамааттык кайрылууларды жазып келишет.

WWW.