936 Бардыгы /

 ОШ.  Кыргызстандын Түштүк башкалаасындагы Султан Ибраимов атындагы Улуттук драма театрында 8-март-Аялдардын эл аралык күнүнө карата майрамдык салтанатуу иш-чара өткөрүлдү. Буга Ош шаарынын мэри Таалайбек Сарыбашов баштаган мэриянын өкүлдөрү, шаардагы баатыр энелер, эмгектин жана согуштун ардагерлери, ар кайсы тармакта эмгектенип жаткан айымдар жана коомдук ишкерлер катышты.

Адегенде Ош шаарынын мэри Таалайбек Сарыбашов бардык айымдарды жаз майрамы менен куттуктап, аялзат – үй-бүлөнүн, жалпы адамзатынын куту, өмүрдүн булагы экендигин белгиледи: – Жаратканнын аялзатына дүйнөнү көрккө бөлөгөн, турмушубуздун маани-мазмунун арттырган сүйүүнүн жана боорукердиктин улуу күчүн ыйгарган экен. Анткени, Сиздерди ак пейилиңиздер, энелик мээримиңиздер, жан дүйнөңүздөр, сулуулугуңуздар, жүрөгүңүздөрдөн чыккан жылуулук жана камкордук турмуштун оор жагдайларында күчүңө күч, демиңе дем кошуп, келечекке ишенимди ого бетер арттырат. Жашообуздун маани-маңызы, тамыры, өсүп-өнүгүүсү жана келечеги эненин, жубайдын, кыз-келиндердин колунда деп билем. Эненин терметкен бешиги жер шаарын тынчтыкка бөлөсө, эже-карындаштарыбыздын жылмайганы ааламга нур чачып, дүйнөнү гүл бакчага айланат. Кыргыздын көптөгөн кыз-келиндери эр жигиттерден кем калбай мекенди коргоодо жана мамлекеттүүлүктү сактоодо да арбын иш жасап, атасынын, жан шеригинин, ага-инилеринин ар дайым жанында болушкан. Эркин демократиялык багытты тандап алган азыркы жолубузда аял залынан ушул асыл сапаты баарыбызга таяныч болууда. Аялзаты эң биринчи мээримдүү эне, жашоонун жарыгы, үйдүн куту деп эсептейбиз. Тилегеним эч бир үйдүн куту өчпөсө, асыл энелердин башынан ак элечеги түшпөсө, энелердин ыйы болбосо, жараткан жамандыктан сактаса дегим келет. Жаз менен наздын, өмүр менен гүлдүн, сулуулук менен аруулукьун, мээрим менен кайратмандыктын туу чокусу болуп жүрө бериңиздер айымдар! – деди Ош шаарынын мэри Таалайбек Сарыбашов

Ошентип, аталган иш-чаранын жүрүшүндө энелерге белгилүү эстрада ырчылардын жана чыгармачыл инсандардын катышуусунда чоң программадагы концерт дагы тартууланды. Баса, майрамдык иш-чарага эалпысынан 700дөн ашуун энелер катышып, алардын ар бирине белек-бечкектер тапшырылды.

Алишер ТОКСОНБАЕВ “АЙМАК”