1,416 Бардыгы /

Караганды облусунун Сатпаев шаарында беш жашар кызды зордуктоо окуясынан кийин чыккан жапырт башаламандыкка байланыштуу сот отурумунда айыптоо актысы окулду. 18-мартта өткөн жараянда прокурор 55 айыпталуучунун аракеттерин баяндады.

Прокурордун айтымында, кичинекей кызды зордуктады деп шектелип жаткан кишинин үйүнүн алдына жүздөй адам чогулган. Алар полициячылардын курчоосун бузуп, шектүү жашаган подъездге кирип барышкан. Алардын аракетинен ошол үйдө турган бир адам жабыр тарткан. Чогулгандар ал киши кылмышка катышы бар деп туура эмес түшүнүп алышкан.

Сотто башаламандыкты жергиликтүү төрт тургун уюштурганы айтылды. Прокурордун билдиришинче, алар адамдарды чогултуп, «үйдү талкалап, жашоочулардын тынчын алып, педофилди издешкен».

Прокурор ондогон кишинин полиция бөлүмүнө барып автоунааларды өрттөп, имаратты талкалаганын «полициячыларды теңине албагандык» деп атады.

Сотто айыпталуучулардын көбү өздөрүнө тагылган айыптарды моюндарына алышып, жасаган иштерине өкүнүшкөнүн жана прокурор менен процессуалдык келишимге макул экенин айтышты. Эгер айыпталуучулар күнөөлөрүн моюндарына алышса, процесс тез аяктап, жазалары жеңилдеши мүмкүн.

Айыпталуучулардын арасында күнөөсүн жарым-жартылай моюндарына алгандар да бар. Алар унааларды өрттөөгө, үйлөрү кыйратууга, полициячыларга кол көтөрүүгө катышы жок экенин билдиришти.

Сатпаевдеги окуяга байланыштуу сот жараяны жабык өтүп жатат.

Сартпаев шаарындагы башаламандык 2020-жылы 24-июлда беш жашар кыздын жоголгону тууралуу кабардан улам келип чыккан. Жоголгон кичинекей кызды бир сааттан кийин 62 жаштагы кишинин батиринен табышкан. Анын үйүнүн алдына жүздөгөн адам чогулуп, аны сотсуз эле жазалоону талап кылышкан. Полиция шектүү адамды үйүнөн алып чыгып, Сатпаев шаардык полиция бөлүмүнө камаган.

Башкы айыпталуучу – «баланы уурдап барып зордуктаган» деп шектелген жаран былтыр октябрда тергөө абагында муунуп каза болгон.

Бардыгы болуп бул иште 57 киши айыпталууда, алардын экөө издөөгө алынган. Төрт киши «жапырт башаламандыкты уюштурду», экөө «жапырт башаламандыкка үндөдү» деп айыпталууда. 51 адам «башаламандыкка катышты» деп шектелсе, 42 адамга «бийлик өкүлүнө күч колдонду» деп кошумча айып тагылды.

WWW