1,128 Бардыгы /

БАТКЕН. Кыргыз Өкмөтүнүн Баткен облусундагы ыйгарым укуктуу Өкүлүнүн орун басары Эрлан Сапарбаев БУУнун  ЮНИСЕФ Уюмунун  Кыргызстандагы Өкүлү Кристин Жольм менен  жолугушту.

Кыргыз Өкмөтүнүн Баткен облусундагы ыйгарым укуктуу Өкүлүнүн орун басары Эрлан Сапарбаев өз сөзүндө ЮНИСЕФтин саламатттыкты сактоо, билим берүү тармактарындагы жана жалпы эле облустун социалдык маселелерин жеңилдетүүдөгү көмөгү үчүн  терең ыраазычылыгын билдирди. Ал эми БУУнун  ЮНИСЕФ Уюмунун  Кыргызстандагы Өкүлү Кристин Жольм өз кезегинде аталган уюмдун иш-аракеттерин Баткен облусунда жүзөгө ашыруудагы  облус жетекчилигинин колдоосун абдан жогору баалады. Андан ары тараптар Баткен облусу менен ЮНИСЕФ Уюму мындан ары да тыгыз  кызматташтыкта иш алып бараарын катуу убадалашты. Алдыда калкты жугуштуу ооруларга каршы эмдөөнүн зарылчылыгы тууралуу элдин сабатын арттыруу, эрте никеге туруу көйгөйүн биргелешип токтотуу, коңшу мамлекеттер менен чектеш  аймактагы жаштардын ынтымагын  чыңдоо максатында маданий-спорттук жана башка иш-чараларды биргелешип өткөрүү, коомчулукта абдан актуалдуу болгон социалдык маселелер боюнча атайын окутууларды уюштуруу, балдар бакчасына тартылган балдардын санын азыркыдан дагы көбөйтүү, таажы илдети шартындагы муктаждыктарды биргелешип чечүү боюнча иш-план даярдоо катуу макулдашылды. 

Айтмакчы, ЮНИСЕФ Уюму Баткен облусунун саламаттыкты сактоо мекемелерин оңдоп-түзөө, медициналык жабдуулар менен камсыздоо, кызматкерлерди окутуу боюнча, ал эми билим берүү тармагында жамааттык балдар бакчаларын ачуу, билим берүү мекемелерин окуу китептери, окуу куралдары менен камсыздоо, мугалимдердин кесиптик деңгээлин жогорулатуу багытында долбоорлорду ийгиликтүү жүзөгө ашырып келатат.

Алишер ТОКСОНБАЕВ “АЙМАК”