1,380 Бардыгы /

ТАЖИКСТАН. Кыргыз Өкмөтүнүн Баткен облусундагы ыйгарым укуктуу өкүлү Өмүрбек Субаналиев менен Тажик Республикасынын Согди облусунун аткаруу бийлигинин төрагасы Раджоббой Ахмадзода жана эки облустун күч түзүмдөрүнүн жетекчилери  Тажикстандын Гулистон шаарында  жолугушту.

         Аймак жетекчилери чек аралаш тилкелерде акыркы убакта орун алган окуяларды, эки тараптан тең чек араны мыйзамсыз басып өтүү боюнча кармалган жарандардын маселелерин дагы кенен-чонон талкуулашты. Ошондой эле буга чейинки кол коюлган протоколдор менен нормативдик-укуктук документтерди кыйшаюусуз аткаруу жагын баса белгилешти.  Ошондой эле Баткен облусу менен Согди облусунун ортосундагы чек арага байланышкан маселелерди чечүүнү тездетүү, аймакта коомдук коопсуздукту камсыз кылуу, кошуна элдердин ынтымагын мындан ары дагы бекемдөө менен чектеш аймактардын кызматташуусун  жакшыртууга өзгөчө маани берилди.  

Жыйынтыгында тараптар, облустар аралык кызматташуу боюнча 10 пункттан турган протоколго дагы кол коюшту. Анда буга чейинки Кыргызстан менен Тажикстандын Өкмөттөр аралык комиссиясы тарабынан бекитилген макулдашуулар, келишимдер жана протоколдорду аткарууга  алууну тийиштүү органдарга тапшыруу, Баткен, Лейлек райондору менен Тажикстандын Исфара, Бабоджон Гафуров райондорунун башчылары, чектеш Айыл Өкмөт башчылары, жергиликтүү Кеңештин депутаттары,  чек аралаш аймакта  чыр чатактардын алдын алуу боюнча тынымсыз түшүндүрүү иштерин жүргүзүү, укук коргоо органдары тарабынан коомдук тартипти жана коопсуздукту сактоону активдештирүү, чек аралаш аймакта орун алган маселелерди чечүү боюнча жумушчу топ түзүү, терроризм, экстримизм менен күрөшүү боюнча биргеликте иш алып баруу, эл арасында аткезчиликке (контрабанда) бөгөт коюу максатында түшүндүрүү иштерин жүргүзүү, чек аралаш аймактагы соода жүргүзүүнү жөнгө салуу, суу ресурстарын пайдаланууда буга чейинки документтердин алкагында кызматташууну активдештирүү, жайыт жерлерин пайдалануу боюнча макулдашууларды кароо, чек аралаш аймактын жашоочуларынын ортосунда массалык-маданий, спорттук иш чараларды уюштуруу жагы баса белгиленди.

Ошондой эле эки тарап мындан ары облустар аралык кызматташууну ого бетер жандандыруу, жаралган көйгөйлөрдү бир тууган, коңшу калк катары, сүйлөшүү жолу менен чечүүгө ишеним артышаарын билдиришти. Облус башчылары таажы илдетине байланыштуу чек аралардын жабылышы, жергиликтүү элди  турмуш-тиричиликке байланыштуу маселелерде бир топ кыйынчылыктарга дуушар кылгандыгын, мындан улам конкреттүү кадамдарга баруу керектиги боюнча дагы бир пикирге келишти. Анткени, таажы илдетинин шартында жашоого, кызматташууга үйрөнүү, учур талабы дейт жетекчилер. Мындан улам Лейлек районундагы “Кулунду”, “Кайрагач”, Баткен районундагы “Кызыл-Бел” чек ара көзөмөл-өткөрүү жайларын ачуу,  жандантуу, жогорку бийлик органдарына сунуш берүү дагы макулдашылды.

Соңунда чек аралаш аймакта аткезчилик (контрабанда)м аракеттери күч түзүмдөрү тарабынан дыкат көзөмөлгө алынаары, мыйзамсыз иш аракеттерге катуу чаралар көрүлөөрү дагы убадаланды.

Алишер ТОКСОНБАЕВ “АЙМАК”