1,128 Бардыгы /

Тажикстанда президент Эмомали Рахмондун 22-мартка Хатлон облусуна белгиленген сапары белгисиз себептерден улам кийинкиге жылды. Бул тууралуу «Озоди» радиосу облустук акимчиликке шилтеме кылып кабарлады.

Мекеме өкүлүнүн айтымында, мамлекет башчы аймакка эми 24-25-март күндөрү келиши мүмкүн.

Өткөн жумада президенттин социалдык маселелер боюнча кеңешчиси Абдужаббор Рахмонзода Эмомали Рахмон Хатлон облусуна 22-мартта бара турганын билдирген. Аталган облустун башчысынын басма сөз катчысы президенттин бул сапары өлкө Эгемендүүлүгүнүн 30 жылдыгына даярдык көрүү иштерине байланыштуу экенин айткан.

Ал ортодо айрым «Твиттер» колдонуучулары менен басылмалар Эмомали Рахмон эл алдына 10-марттан бери чыга электигин, анын милдеттерин аткаруу улуу баласы, парламенттин жогорку палатасынын төрагасы Рустами Эмомалиге жүктөлгөнүн кабарлап жатышат.

bne.intellinews сайты мамлекет башчынын көптөн бери эл алдына чыкпаганы анын саламаттыгы начарлап кеткендиги тууралуу кептерди жаратып жатканын жазды.

18-мартта Eurasianet сайтынын редактору Питер Леонард «Твиттердеги» билдирүүсүндө президенттин басма сөз кызматы 5-марттан бери мамлекет башчынын бир дагы жаңы сүрөтүн жарыялабаганын белгилеген.

21-мартта Эмомали Рахмондун басма сөз катчысы Абдуфаттох Шарифзода президенттин саламаттыгы тууралуу маалыматтарды четке кагып, мамлекет башчынын акыркы күндөрү жүктөгөн сүрөттөрүнүн баары жаңы экенин билдирди.

2019-жылы социалдык түйүн колдонуучулары Эмомали Рахмондун саламаттыгы Ришт районуна жасаган сапары маалында кескин начарлаганын жазып чыгышкан. 2020-жылы жайында президенттин коронавирус жуктуруп алганы тууралуу билдирүүлөр пайда болгон. Бирок анда бул маалыматтар ырасталган эмес.

68 жаштагы Эмомали Рахмон Тажикстанды 1992-жылдан бери башкарып келет. Ал өткөн жылы октябрда шайлоочулардын 90,92% добушун алып, бешинчи жолу президенттик шайлоодо жеңишке жеткен. Батыш өлкөлөрүнөн келген байкоочулар тарабынан Тажикстанда өткөн Рахмондун тушундагы бир да шайлоо ачык жана эркин деп табылган эмес.

WWW