1,626 Бардыгы /

Өзбекстандын Кыргызстандагы Сох анклавын бул өлкөнүн негизги аймагы менен байланыштырган Сох – Риштан жолундагы «Кайтпас» жана «Өтүкчү» чек ара бекеттери ачылды.

1-апрелде өткөн бекеттердин расмий ачылышына кыргыз өкмөтүнүн Баткен облусундагы ыйгарым укуктуу өкүлү Өмүрбек Суваналиев, Өзбекстандын Фергана облусунун акими Хайрулло Бозоров, эки өлкөнүн күч органдарынын өкүлдөрү жана жергиликтүү тургундар катышты

Маалыматка караганда, мындан ары аталган бекеттерден жүргүнчү ташыган автоунаа жана жөө жүргүнчүлөр күндүз өтө алышат. Азырынча оор жүк ташуучу автомашиналарга уруксат берилген жок.

Фергананын жетекчиси Бозоров «Азаттыкка» Сохто эч кандай чектөө болбой турганын, эки өлкөнүн жарандары тоскоолдуксуз өтө аларын билдирди.

Сох – Риштан жолу 2013-жылы Чарбак окуясынан кийин Кыргызстан жактан бир тараптуу жабылган. Анын натыйжасында Сох анклавынын тургундары Өзбекстандын негизги аймагына барып-келүү үчүн 80 чакырымдай жол басып, Кыргызстандын Кызыл-Кыя шаарына жакын жайгашкан «Пүлгөн» чек ара өткөрмө бекети аркылуу бир топ жерди айланып өтүшчү.

Буга чейин Кыргызстандын жарандары үчүн бул жол аркылуу транзиттик каттамга чектөөлөр бар болчу.

2019-жылы сентябрда жол бир саатка ачылып, кайра жабылган.

Баткен облусунун Кадамжай районунда кыргыз-өзбек чек арасындагы «Өтүкчү» Сохко кире бериштеги, ал эми «Кайтпас» Өзбекстандын негизги аймагына кирүүчү бекет.

Быйыл 24-25-мартта Ташкентте Кыргызстан менен Өзбекстандын ортосундагы мамлекеттик чек араны делимитациялоо жана демаркациялоо боюнча өкмөт аралык комиссиянын жыйыны өтүп, жыйынтыгында протокол кабыл алынган.

Бул сүйлөшүүлөргө Кыргызстандын атынан Улуттук коопсуздук боюнча мамлекеттик комитеттин (УКМК) жетекчиси Камчыбек Ташиев катышкан. Ал 1-апрелден тартып адамдардын, жеңил автоунаалардын жана кичи автобустардын (20 орунга чейин) өтүүсү үчүн «Кайтпас» жана «Өтүкчү» өткөрүү пункттары ачылмай болгонун айткан. Ошондой эле Өзбекстан «Кара-Суу», «Бек-Абад», «Ынтымак», «Кең-Сай» жана «Сейдикум» өткөрүү пункттарын калыбына келтирүү иштерин жүргүзмөй болгонун, кийин даяр болгондо ал пункттар да ачыларын билдирген.

WWW