915 Бардыгы /

Ушул жылдын 11-апрелине мерчемделген Ош шаардык Кеңешинин депутаттарынын шайлоосу бул кебетесинде чоң чыр-чатак менен коштолот өңдөнүп калды. Жашырып не. Адаттагыдай эле административдик жана акча ресурстары куп эле пайдаланалып жаткан чагы. Бирок, бул жөнүндө үстөккө-босток коңгуроо кагып жатышкан партиялар жана Ата Мекендик серепчилер аталган маанилүү саясий өнөктүктүн жүрүшүнө БШК, ошондой эле  укук коргоо органдары жетиштүү даражада абай салышпай жатышкандыгына өтө кабатыр.

• Биздин партиябызды Ош шаардык Кеңешинин депутаттарынын

шайлоосунан жөнсүз эле четтетип коюшту, – деп аябай тызылдады “Тилектештик” партиясынын төрагасы Төлөгөн Келдибаев. – Тиешелүү мекемелер мунун жүйөөлүү себебин түшүндүрүшкөн дагы жок! Сыягы, биздин туруктуу оппозициялык маанайды тутунганыбыз  азыркы бийликке чындап жакпай калган өңдөнөт. Убакыт чукулдугунан улам БШКга жана сотторго калыстык үчүн даттанган деле жокпуз…

• Бул эч нерсе эмес! Кечээ эле бийликчил “Биримдик” жана

 “Мекеним – Кыргызстан”партияларынын тизмесинде Жогорку Кеңешке аттанышып жыдып, а түгүл Президент Сооронбай Жээнбековдун тактан кулатылышын шарттагандар бүгүн кылы кыйшайбастан туруп кайрадан эле Ош шаардык Кеңешинин депутаттыгына бийликтин “Ата Жут-Кыргызстан”партиясынын атынан саясий күрөшкө белсеништи, – деп аябай тызылдады “Улуттар Биримдиги” партиясынын жол башчысы, Ош шаарынын экс-мэри Мелисбек Мырзакматов Кыргызстандын Түштүк башкалаасынын шайлоочулары менен жолугушуусунда.  – Президент Садыр Жапаров бийликти тазалаганы ушулбу? А биз булардан кескин айырмаланып, “Улуттар Биримдиги” партиясынын талапкерлерин жаңы жүздөр жана таза күчтөр менен жаңыладык.

А бул арада Ош шаардык Кеңешинин шайлоосуна катышып жатышкан тогуз партиянын бешөө – «Улуу Журт», «Республика», «Улуттар Биримдиги», «Бүтүн Кыргызстан» жана «Бир Бол» партияларынын өкүлдөрү атайын басма сөз жыйынын өткөрүшүп, Президент Садыр Жапаровго дагы чукул Кайрылуу жасашты.

Аталган беш саясий уюмдун өкүлдөрү Кыргызстандын Түштүк

башкалаасында Ош шаардык Кеңешинин депутаттарынын шайлоосунун үгүт жараяны одоно мыйзам бузуулар менен коштолуп жаткандыгына катуу даттанышты. Алар жергиликтүү бийлик административдик ресурстарын ачык эле колдонуп, а түгүл добуштарды сатып алуу аракети катуу жүрүп жаткандыгына арызданышты. Ошондой эле Ош шарынын мэри Таалайбек Сарыбашовду айрым партияларды ачык эле сүрөп келаткандыгы үчүн айыпташып, мамлекет жетекчиси Садыр Жапаровду бул маселеге чукул арада өзгөчө көңүл бурууга чакырышты.

Ош шаардык Кеңешине шайлоосуна катышып жаткан «Республика» партиясынын өкүлү Азат Мусаев Президент Садыр Жапаров өзү жакында эле Ош шаарынын мэри Таалайбек Сарыбашевди кабыл алгандыгын баса белгилеп, муну шайлоого ачыктан ачык кийлигишүү сыңары сыпаттады: – Эмне, Пезидент Ош шаарынын мэри Таалайбек Сарыбашевди башка күндөрү деле кабыл алса болбойт беле?Демек, биздин күмөн санаганабыз негиздүү! Көшөгө артында мамлекет башчысы Садып Жапаров кайсыл партияларды сүрөө, а кайсыларын жыдытуу боюнча тапшырма бергендиги эч кимге жашыруун эмес!

         Ал эми жергиликтүү Кеңештердин шайлоосунун жүрүшүнө такай абай салып жүргөн серепчи Жыргалбек Жээнбеков бул саясий өнөктүк кадам сайын олуттуу мыйзам бузуулар менен коштолуп жаткандыгын шардана кылды.

• Ыя, айланайындар! Ош шаарындагы кээ бир партиялар адаттагыдай

шайлоочулардын алдын ала тизмесин түзүшүп, а түгүл алардын добуштарын дагы алдын ала соодалашып, кадимкидей үргүлжүм эле сатып алып жатышпайбы. Ош шаарынын укук коргооо органдары ушуларды неге аңдып, үзгүлтүксүз көзөмөлдөшпөйт жана мыйзамдуу чарасын дагы көрүшпөйт, ыя? – деп ыраса чырылдады оштук серепчи Жыргалбек Жээнбеков.

         Ошентип, Ош шаардык Кеңешинин депутаттарынын шайлоосуна катышып жатышкан айрым париялар эгерде добуштардын жыйынтыгы анык бурмаланса, анын таптакыр тааныбай турушкандыгын, ошондой эле каршылык көрсөтүү, нааразычылык аякцияларын  – элдик толкундоолорду уюштурушаарын улам-улам эскертишүүдө.

         Алишер ТОКСОНБАЕВ