717 Бардыгы /

АКШ өнөктөштөрү менен 2022-жылы Бээжинде өтө турган кышкы Олимп оюндарына бойкот жарыялоо маселесин талкуулоого ниеттенип жатат. Бул тууралуу Deutsche Welle басылмасы Мамлекеттик департаменттин басма сөз өкүлү Нед Прайска шилтеме кылып билдирди.

Прайстын айтымында, жамааттык негизде бойкот жарыялоо бир эле Вашингтондун эмес, анын саясий өнөктөштөрүнүн кызыкчылыгын да көздөйт. Прайс соңку мезгилде Кытай бийлигине карата жапырт түрдө адам укугун бузуу айыптары айтылып келгендиктен, Олимп оюндарына кандай мамиле жасалышы керек деген маселе талкууланып келе жатканын билдирди.

Прайс азырынча кандайдыр бир так мөөнөт тууралуу сөз жок экенин айтып, аталган эл аралык спорттук мелдештерге дагы убакыт бар экенин белгиледи.

Өз кезегинде Кытайдын Тышкы иштер министрлигинин (ТИМ) расмий өкүлү Чжао Лицзянь Олимп оюндарын саясатташтыруудан алыс болууну эскертти.

Эл аралык Олимпиада комитетинин президенти Томас Бах бул спорттук мелдештерге бойкот жарыялоого каршы экенин билдирген.

Буга чейин Европа Биримдиги уйгур баштаган мусулман азчылыктарынын укуктарын бузганы үчүн соңку 30 жылда биринчи жолу Кытайга санкция киргизген.

Канаданын төмөнкү палатасы Бээжиндин мындай саясатын «геноцид» катары тааныган.

Европада укук коргоочулар менен коомдук ишмерлер Кытайдын Шинжаң аймагындагы адам укугу бузулган учурларга көп көңүл бурушууда.

WWW