1,137 Бардыгы /

          ЖАЛАЛ-АБАД. Ички иштер министрлигинин кылмыштуу топтор менен күрөшүү кызматынын (ИИМдин КМКсынын) Аймактар аралык башкармалыгынын ыкчам кызматкерлери куралдар менен ок-дарылардын  мыйзамсыз сакталган бүтүндөй арсеналын табышты.

Ички иштер министрлигининмаалыматына таянсак, үстүбүздөгү  жылдын апрель айынын башында  ИИМдин КМКсынын Аймактар аралык башкармалыгынын  кызматкерлери адегенде ок атуучу куралдарды жана ок-дарыларды сатууну көздөп жаткан жарандар жөнүндө ыкчам маалымат алышкан.  Белгисиз адам ок атуучу куралдарды сатуу жолун түптөп алууну көздөп, сатып алуучуларды издеп жаткандыгы аныкталган.

Бул факты Кылмыштардын жана жоруктардын бирдиктүү реестрине катталып, Кыргыз Республикасынын Жазык кодексинин 253-беренесинин 2-бөлүмү (Куралдарды, ок-дарыларды мыйзамсыз жүгүртүү) менен сотко чейинки өндүрүш башталган. Ок атуучу куралдарды мыйзамсыз сактоого тиешеси барларды аныктоого жана  бул ок атуучу куралдар менен кылмыштардын жасалышына бөгөт коюуга багытталган ыкчам иш-чаралар жүргүзүлө баштаган. 2021-жылдын 7-апрель күнү Жалал-Абад облусунун Кербен шаарында саат 09:30 чамасында тергөө амалдарын жүргүзүү учурунда Аймактар аралык башкармалыгынын кызматкерлери “Мицубиси” үлгүсүндөгү автоунааны токтотушкан. Автоунааны куралдарды сатууга шектелген Аксы районунун жашоочусу Д.Р. башкарып келе жаткан.  Кароо жүргүзүү учурунда автоунаадан  7.62 мм калибрдүү СКС үлгүсүндөгү карабин (ок атуучу курал) табылган. Сотко чейинки өндүрүштүн алкагында   дагы бир шектүү Аксы районунун 1951-жылы туулган Д.Энин  жашаган жерине  түнтүү иш-чаралары  жүргүзүлгөн.

Акыркы маалыматка караганда, аталган үйгө тинтүү жүргүзөлгөндө, ок атуучу куралдардын жана ок-дарылардын бүтүндөй арсеналы табылды: СКС үлгүсүндөгү карабин, 2 бирдик  ТОЗ-8 үлгүсүндөгү курал, 2 бирдик 16 жана 12 калибрдүү сайсыз ок атуучу курал, андан сырткары пневматикалык тапанча жана күжүрмөн куралдардын ар кандай тетиктери, ар кандай түрдөгү ок-дарылар табылып алынды. А үзө уруксат алган документтер бир гана куралга тиешелүү болгон.Мындан тышкары тинтилген үйдөн Кызыл китепке кирип, атууга уруксат берилбеген эки сүлөөсүндүн териси дагы табылды. Ошондой эле, болжол менен  маңзаттарга окшош зат дагы табылып алынды. Бул боюнча дагы экспертизалар дайындалды. Ушул тапта ИИМдин Тергөө кызматынын Ош шаарындагы өкүлдөрү  мындан аркы тергөө иш-чараларын жүргүзүп жатышат.

Алишер ТОКСОНБАЕВ, өз кабарчы