891 Бардыгы /

          БАТКЕН. Кыргыз Өкмөтүнүн Баткен облусундагы ыйгарым укуктуу Өкүлү Өмүрбек Суваналиев өлкөбүздөгү “Жоокерлердин энелери” комитетинин төрайымы Уулкан Байгубатова менен жолугушту.

          Кездешүүнүн жүрүшүндө тараптар Баткен облусунун аймагында кызматтык милдетин өтөп жатышкан аскер кызматкерлеринин жана жоокерлердин жашоо-шарты, мамлекет тарабынан аларга көрүлүп жаткан камкордуктар, аталган жарандардын муктаждыктарын чечүү жана коопсуз шарттарды түзүү маселелерин ачык-айкын сүйлөшүштү. 

Кыргыз Өкмөтүнүн Баткен облусундагы ыйгарым укуктуу Өкүлү Өмүрбек Суваналиев сөз арасында Баткен облусу чек аралаш, стратегиялык мааниге ээ болгон аймак экендигин баса белгилеп, өрөөндүн өнүгүүсү үчүн биринчи кезекте тынчтык, коопсуздук жана туруктуулук абдан зарылдыгын, Баткенде атуулдук милдеттерин ак ниеттүүлүк менен аткарган, чыныгы мекенчил эр азаматтар кызмат өтөөрүн, алардын иши башка аймактарга салыштырмалуу абдан жооптуу экендигин дагы өзгөчө белгиледи.

Жолугушуу соңунда Кыргыз Өкмөтүнүн Баткен облусундагы ыйгарым укуктуу Өкүлү Өмүрбек Суваналиев “Ар бир жоокер бакубат жана коопсуз жашоого татыктуу! Кандайдыр бир өз кызыкчылыгын көздөгөн күчтөрдүн айынан бир дагы жоокер жабыркабашы керек” –  деп, Кыргызстандын жетекчилиги аскерлер үчүн заманбап шарттарды жаратып жатышкандыгын өзүнчө кошумчалады.

Алишер ТОКСОНБАЕВ, өз кабарчы