867 Бардыгы /

Эл аралык Адам укугун коргоо комитетинин Борбор Азия боюнча координатору Турсунбек АКУН кан күйгөн Баткен жергесин түгөл кыдырды. Ушундан соң гана кабарчыбызга курган маегинде Бириккен Улуттар Уюмунун (БУУнун) Адам  укуктарын коргооо боюнча комитетине (Эл аралык сотко) кайрылып, Тажикстан Президенти Эмомали Рахмонду коңшу өлкөгө – Кыргызстанга аскердик агрессиясы үчүн кылмыш жазасына тарттырууга аркет кылаарын ачыктады.

-Турсунбек мырза, чек ара чырынан башы таптакыр арылбаган Баткен жергесин түгөл кыдырууңуздун эң негизги себеби эмнеде?

-Чырды өзү ким баштады? Эмне үчүн? Дал ушул суроолорго чыныгы жоопту издеп, акыры баарына тең жетиштүү далилдерди (сүрөттөрдү, видеотасмаларды, аудио жазууларды, жергиликтүү тургундардын үндөрүн – маектерин) топтодум.

-Эми буларды андан ары эмне кыласыз?

-Алишер, коңшу Тажикстандын Президенти Эмомали Рахмонбүгүнкү күндө чыныгы диктаторго айлангандыгын, а түгүл коңшу өлкөлөргө дагы ачыктан ачык сес көрсөтүп, көз арта баштагандыгын айныгыс далилдеген фактылар колума тийди. “Бетке айткандын заары жок!” – дешет кыргыздар. Адегенде коңшу мамлекетибиздин жетекчиси Эмомали Рахмонго дагы жолугуп, чындыкты анын бетине айтамын.

-Эгерде а киши Сизди таптакыр кабыл албасачы? Анда кантесиз?

-Адамгерчилик кылып коңшу Тажикстандын Президенти Эмомали Рахмондун алдынан өтүп коюу – бул менин парызым. Буга көнбөсө, чындыкты моюндап, Кыргызстандан кечирим сурабаса, Бириккен Улуттар Уюмунун (БУУнун) Адам  укуктарын коргооо боюнча комитетине (Эл аралык сотко) даттанам. Анткени, Эмомали Рахмон Баткенде Кыргызстанга ачык эле кол салбадыбы. Эми Эл аралык сотто бул кылмыштары үчүн сөзсүз жооп берүүгө тийиш! Дегеним күтүлбөгөн агрессиянын кесептинен 36 мекендешибиз  өлтүрүлүп, дагы 189 кыргызстандык ар түрдүү даражада жараланбадыбы.

-Турсунбек мырза, дүйнөлүк коомчулук Сизди жана Кыргызстанды колдой тургандыгына ишенесизби?

-Кыргыз Республикасы – Бириккен Улуттар Уюмунун (БУУнун) толук кандуу мүчөсү. Андыктан, БУУ Тажик диктатору Эмомали Рахмонду мыйзам чегинде тез арада тыйып, аны сөзсүз теске салууга тийиш! Болбосо, “Үйрөнгөн адат калабы, Уйга жүгөн салабы?” – дегендей, ашынган Ажо жоопкерчиликке тартылбаса, коңшу өлкөбүздөн кутурган башчысы ар шылтоонун башын дагыле кылтыйтып, биздин Кыргызстанга агрессиясын мындан ары улантмак турсун, оо бетер күчөтөт. Анда мамлекеттер аралык согушка айланып, муну токтотуу оңбогондой азапка айланат!

Алишер ТОКСОНБАЕВ, өз кабарчы