999 Бардыгы /

Тажикстандын Элдик-демократиялык партиясынын төрагасынын орун басары Хайриниссо Юсуфи кыргызстандыктарга кайрылып, эки өлкөнүн ортосундагы тынчтык жана ынтымакты калыбына келтирүү үчүн чогуу аракет көрүүгө чакырды. Партияны Тажикстан президенти Эмомали Рахмон жетектейт.

Хайриннисо Юсуфи 12-майда орус жана кыргыз тилинде видеокайрылуу жасап, Тажикстан жана Кыргызстан жарандары тынчтык жана ынтымакта жашоосу керек экенин айтты.

“Көп кылымдык коңшулук тарыхыбызда көптөгөн сыноолорду баштан өткөрүп, бири-бирибизден үйрөндүк. Ар бирибиздин коңшу өлкөдө жакшы кесиптеш, тааныш, дос, тууганыбыз бар. Ушул күндөрү эки өлкөдө тең бизди жалпы тарых, туугандык байланыш, маданият жана дин бириктирип турары көп айтылып жатат. Биз бүгүн биригишибиз керек, эки тарап тең жаратмандык күч менен тынчтыкка жана ынак коңшулукка умтулуп, эркибизди көрсөтүшүбүз керек. Биздин эл тынчтыкта өмүр сүрүшү керек”, – деди Хайриниссо Юсуфи.

Тажикстандын башкаруучу партиясынын төрагасынын орун басары кыргызстандыктарга кыргыз-тажик чек арасындагы куралдуу кагылыштан эки апта өткөн соң кайрылды. Буга чейин тажик саясатчылары жана ЖМКлары чек ара жаңжалын “байкамаксан болуп коюуну” чечкени үчүн соцтармактарда сынга кабылышкан.

28-29-30-апрелде кыргыз-тажик чек арасындагы куралдуу жаңжалда 36 кыргызстандык курман болуп, 180ден ашуун адам жараат алды.

Тажик тараптан 19 адам каза болгону, 87 киши жаракат алганы расмий түрдө жарыяланды.

Баткен облусунда 78 турак үй, эки мектеп, бир фельдшердик жана акушердик пункт, үч чек ара бекети, бир бала бакча, 10 май куюучу бекет, ички иштер бөлүмүнүн бир имараты жана сегиз дүкөн талкаланып, өрттөлгөн.

Коңшу өлкөнүн Согд облусунун бир нече айылында 14 турак жай толук бузулуп, эки үй, бир курулуш жарым-жартылай жабыркаганы маалымдалган.

WWW.