1,128 Бардыгы /

Москванын бийлиги 17-майда орусиялык укук коргоочу, Нобель сыйлыгынын лауреаты Андрей Сахаровдун 100 жылдыгына арналган көргөзмөнү өткөрүүгө уруксат берген жок.

Москвадагы Сахаров борбору “Андрей Дмитриевич Сахаров: чочулоо жана үмүт” аттуу көргөзмөнү уюштурууну пландаган. Ал 17-майда укук коргоочунун туулган күнүнө төрт күн калганда көчө көргөзмөсү түрүндө ачылмак.

Көргөзмөдө Сахаровдун, советтик жана орусиялык сүрөтчүлөрдүн сүрөттөрү, укук коргоочунун мемуарындагы учкул сөздөр, макалалар коюлмак.

18-майда “Дождь” телеканалы бул көргөзмөнүн ордуна “Казакстан – Евразиянын жүрөгү” деген көргөзмө ачылганын кабарлады. Сүрөт көргөзмө Казакстандын тарыхын жана туристтик дараметин баяндайт. Анда өзүнчө бир стенд “елбасы” Нурсултан Назарбаевге арналган. Көргөзмө 23-майга чейин уланат.

Бул арада Сахаровдун 100 жылдыгына арналган Эркиндик фестивалы 21-майда өтөт. Ал бардык саясий туткундарга арналат.

Андрей Сахаров 1921-жылы 21-майда Москвада төрөлгөн. Ал физик, суутек бомбасынын негиздөөчүлөрүнүн ири болгон. 1975-жылы Тынчтык боюнча Нобель сыйлыгын алган. 1979-жылы Сахаров советтик аскерлердин Ооганстанга киришине каршы билдирүүлөрдү жасаган. Мындан соң аны үй-бүлөсү менен Горькийге ( азыркы Нижний Новгород) айдап жиберишкен.

Сахаровдун сүргүнү 1986-жылы аяктаган. Окумуштуу Москвага келгенден үч жыл өткөн соң өз батиринде көз жумган.

Быйыл орус бийлиги Москадагы “Сахаров борборун” “чет өлкөлүк тыңчылардын” тизмесине кошкон.

WWW.