1,272 Бардыгы /

Жакынкы убакта Ош шаарынын аймагында кыймылсыз мүлктүн базардагы баасы 30%га жогорулашы күтүлөт.
Бул тууралуу «Риэлт-Строй» кыймылсыз мүлк агенттиги менен риэлтордук кызмат боборунун жетекчиси Улан Аразбаев билдирди.
Анын айтымында, баалардын жогорулашы экинчи базардагы көп кабаттуу үйлөрдө гана болушу күтүлөт.
«Биз 18 жылдан бери Ош шаарында кыймылсыз мүлк базарында иштеп келебиз. № 77, 103, 104, 105 сериясындагы көп кабаттуу үйлөрдүн баасы ушул жылдын июнь айында жогорулайт. Баага таасир берген негизги мүнөздөмө, сериясынын номери, үйдүн өзүнө, жайгашкан ордуна, районуна жана кабатына байланыштуу болот», – деди У.Аразбаев.
Анын айтымында, ар кандай аймактагы батирлердин баасы бөлмөлөрдүн саны менен имараттын планына жараша болот.
«Учурда Ош шаарында бир бөлмөлүү батирлердин саны 18 миң доллардан баштап 28-30 миң долларга чейин, 2 бөлмөлүү батирлер 30 миңден баштап 45-48 миң долларга чейин, 3 бөлмөлүү батирлер 40 миңден баштап 80 миң долларга чейин бааланат. Элиталык турак-жайларда, же жаңы конуштарда баалар өзгөрбөйт. Бул жерде чарчы метрге 450 доллардан баштап 600 долларга чейин сурашат», – деди У.Аразбаев.
Андан тышкары, Бишкек шаарынан айырмаланып Ош шаарында жеке секторлордогу үйлөрдүн баасы көп кабаттуу батирлердин бааларына караганда бир аз жогору турат, деп кошумчалады У.Аразбаев.
Анын айтымында, Ош шаарында жеке секторлор 40 миңден баштап 300 миң долларга чейин бааланат.

Булак- turmush.kg