1,473 Бардыгы /

ОШ. Кыргызстандын Түштүк башкалаасында Алай районуна караштуу Талды-Суу айылында жашап жатышкан памирлик кыргыздардын балдары  үчүн атайын экскурсия уюштурулду.

Памирлик боордошторубуздун балдары  үчүн атайын экскурсия Ош шаарындагы Алымбек Датка этнографиялык комплексинен башталды. Андан ары алар “Сулайман-Тоо” улуттук тарыхый-археологиялык музей комплекси менен кенен-чонон таанышышты. Ыйык Сулайман Тоого көтөрүлүп, саякатташты.Султан Ибаримов атындагы Ош улуттук драма театрына жана балдардын куурчак театрына дагы баш багышты. Андан соң зоопаркта узакка саякатташты.

Ушуга улай Токтогул Сатылганов атындагы Ош облустук китепканасы менен кең-кесири таанышышты. Бул жерде таланттуу балдардын катышуусунда концерт уюштурулду. Мындан кийие Токтогул Сатылганов атындагы эс алуу багына саякатташты.

Соңунда Кыргыз Өкмөтүнүн Ош облусундагы ыйгарым укуктуу Өкүлү Жарасул Абдураимов памирлик кыргыздардын балдарынын ал-акыбалын өз кеңсесинде сураштырып, баары тең даам таттырып, белек-бечкектерин тапшырды.

Эске салчу жагдай: буга дейре Кыргыз Өкмөтүнүн Ош облусундагы ыйгарым укуктуу Өкүлү Жарасул Абдураимов Алай районуна караштуу Талды-Суу айылында жашап жатышкан памирлик кыргыздарга паспорт тапшырууга барганда жети жаштагы Хусейнге экскурсия Ош шаарында кызыктуу экскурсия уюштурууну убада кылган эле.

Алишер ТОКСОНБАЕВ