894 Бардыгы /

БАТКЕН. УКМК Кадамжай районундагы жергиликтүү Кеңештин депутатын маңзат ташыган Эл аралык топко тиешеси бар деп күмөндөп жаткан чагы. Анткени, кармалган депутат 2021-жылы 11-апрелде өткөн шайлоодо Халмион Айыл Өкмөтүндө жергиликтүү Кеңешке депутат болуп шайланган. Ал өзү аймагында эң көп добуш топтогон төрт талапкердин бири экен. Шектүү О.Т.Б. 1966-жылы 30-майда туулган.

Ошентип,УКМК бул ирет Тажикстан—Кыргызстан—Өзбекстан маршруту боюнча маңзат ташыган уюшкан кылмыштуу топтун ишине акыры бөгөт коюп олтурат. Маалыматка караганда, уюшкан кылмыштуу топтун уюштуруучусу — Баткен облусунун Кадамжай районундагы жергиликтүү Кеңештин депутаты О.М.Б. маңзаттарды Кыргызстан аркылуу Тажикстан менен Өзбекстандын аймагына тынымсыз өткөрүп турган. Ал өзү 7-июнда Кадамжай шаарында маңзат соодалап жаткан жеринде кармалды. Баса, кармалган маңзаттар андан ары Өзбекстанга алынып кетмек.

Айтмакчы, О.М.Б. жашаган жерде тинтүү жүргүзүлүп, үйүнөн 9 кило чийки апийим, 4 кило гашиш, 37,5 кило марихуана, 1 ок атуучу курал (уруксат кагазы жок), 232 миң доллар, 42 миллион 299 миң 500 Өзбек суму жана 106 миң Кыргыз сому дагы табылды. Фактынын негизинде жалпысынан үч адам — О.М.Б., О.К.М. жана О.К.А. кармалышып, Баткен ШИИБдин убактылуу кармоочу жайына киргизилди. Бул ишке катыштыгы бар Тажикстандын жарандарын издөө иш-чаралары кызуу жүрүп жаткан чагы.

Алишер ТОКСОНБАЕВ, өз кабарчы