1,134 Бардыгы /

Казакстандын Түркстан облусундагы Шардара суу сактагычында электр-кайырмактардын жардамы менен балык кармап жаткан кишилер корукчуларга кол салышты. Бул тууралуу жергиликтүү басылмалар кабарлашты.

Маалыматка караганда, браконьерлер корукчуларды арматура жана кайыктын калактар менен уруп, андан соң качып кетишкен. Алардын бири Серик Жанысбай жаракат алып, райондук ооруканага жеткирилген. Анын мээси чайкалып, денеси көгөрүп, сыйрылган. Азыр абалы канааттандыраарлык деп бааланууда.

Сериктин айтымында, 8-июндагы рейддин жүрүшүндө алар браконьерлердин кайыгында 60 килограммга жакын балык, аккумулятор жана Казакстанда колдонууга тыюу салынган электр-кайырмактары бар экенин көрүшкөн. Колго түшүрүү аракетин көргөндө алар корукчуларга каршылык көрсөтүшкөн.

— Кесиптешимдин бири сууга кулап кеткенде алар кайырмакты сууга салып жиберип, ал кыймылдай албай калды. Мен ага жардам берейин деп жатсам эки кайык менен дагы төрт киши келип, арматура жана кайыктын калактары менен кол салышты. Андан соң биздин телефондорубузду сууга таштап, качып кетишти, — деди ал.

Полиция браконьерлердин тек-жайы аныкталып, алты киши кармалганын кабарлады. Аларга каршы «Бийлик өкүлүнө карата зомбулук көрсөтүү» беренеси боюнча сотко чейинки тергөө иштери башталды. Казакстанда мындай кылмыш үчүн 10 жылга чейин эркинен ажыратуу жазасы каралган.

WWW.