969 Бардыгы /

Казакстанда коронавируска каршы дагы бир жергиликтүү вакцина –QazCoVac-P препаратынын клиникалык сыноосу башталды. Бул тууралуу Биологиялык коопсуздук маселелери боюнча илимий-иликтөө институту кабарлады.

Сыноонун биринчи жана экинчи фазасы Тараздагы көп тармактуу ооруканада өтөт. Ага 18ден 50 жашка чейинки ыктыярчылар катышат. Институт жалпысынан ага канча киши тартыларын айткан жок, бирок вакцина жаныбарларга жасалган клиникага чейинки сыноодо жакшы жыйынтык көрсөткөнүн белгиледи.

Вакцинаны клиникалык жактан сыноого Казакстан Саламаттык сактоо министрлигинин медициналык жана фармацевтикалык комитети уруксат берген.

Маалыматка караганда, QazCoVac-P – SARS-CoV-2 коронавирусунун жасалма синтезделген белокторунун негизинде жасалган суббирдиктүү вакцина.

Казакстан жергиликтүү QazVac препаратын апрелде колдоно баштаган. Ал маалда сыноонун клиникалык сыноосу аяктай элек болчу. Вакцинаны иштеп чыккандар “Казвак” коопсуз, вирустан 96 процентке коргойт жана орусиялык “Спутниктен” кем калбайт деп айтып келишет.

Эркин окумуштуулар препаратты чыгарууда формальдегид деген зат кандай максатта жана кандай көлөмдө колдонулган деген суроо салышууда.

Вакцинаны иштеп чыккан Улуттук илимий изилдөө институтунун кызматкерлери күмөн саноолор негизсиз деп, үчүнчү фазанын жыйынтыгын жакынкы күндөрдө жарыялоого убада берүүдө.

19 миллион калкы бар кошуна мамлекетте коронавируска каршы эмдөө февраль айында башталган. Бул үчүн Карагандыда өндүрүлгөн орусиялык “Спутник V” вакцинасынан башка, Кытайдын “Sinopharm” жана жергиликтүү “QazVac” вакциналары колдонулуп жатат.

Казакстан Саламаттык сактоо министрлигинин 15-июндагы маалыматы боюнча өлкөдө 2,5 миллион киши вакцинанын бир компонентин, 1,4 миллион киши эки дозасын тең алды.

WWW.