768 Бардыгы /

ЖАЛАЛ-АБАД. Жалал-Абад облусунун аймагында жергиликтүү милиция тарабынан жаш өспүрүмдөр арасындагы кылмыштуулуктун, ошондой эле ар түрдүү кырсыктардын алдын алуу жараяны күчөтүлдү.

Маселен, Майлуу-Суу ШИИБсынын жана калаа мэриясынын социалдык өнүктүрүү бөлүмүнүн кызматкерлери шаар аймагында “Өспүрүм – эмгек” аталышындагы иш-чараны биргелишип  өткөрүштү. Мунун алкагында жашы жете элек өспүрүмдөрдүн оор жумуштарга тартылуусу тыкыр көзөмөлгө алынды. Иш-чаранын жүрүшүндө ар кандай жумуштарда иштеп жатышкан өспүрүмдөр аныкталып, алардын ата-энелеринин жана мыйзамдуу өкүлдөрүнүн арасында түшүндүрүү иштери жүргүзүлдү. Ал эми Аксы РИИБсынын жашы жете электер менен иштөө инспекциясынын кызматкерлери суу кырсыктарынын алдын алуу жумуштарын алып барышууда. Көлгө чөмүлүүгө кооптуу аймактарга эскертүү тактайчалары орнотулуп, жергиликтүү тургундарга жаш балдарды такай көзөмөлдөө керектиги катуу эскертилып жаткан чагы.

Жогорудагыдай ырааттуу иш-чаралар Токтогул РИИБсы тарабынан дагы жүргүзүлүп, сууга киринип жатышкан өспүрүмдөргө чоңдордун көзөмөлү жок сууга түшпөө керектиги катуу түшүндүрүлдү. Ошондой эле милициянын көчмө кабылдама унаасы менен мал жана дүкөн уурулуктарынын алдын алуу багытында район тургундары менен жолугушуулар өткөрүлүп, алардын сын-сунуштары кабыл алынды.

Алишер Токсонбаев