939 Бардыгы /

ЖАЛАЛ-АБАД. Жалал-Абадда турак жайын акысыз камсыздандырган мүмкүнчүлүгү чектелген жаранга каражат бөлүндү. Бул жөнүндө Министрлер кабинетинин Жалал-Абад облусундагы ыйгарым укуктуу Өкүлчүлүгүнөн кабарлашты.

Маалыматка караганда, Жалал-Абад облусундагы Ноокен районунун Таштак айылынын тургуну Асылкан Арзыкулова ден соолугунан мүмкүнчүлүгү чектелип, экинчи топтогу майып болгондугуна байланыштуу турак жайын акысыз камсыздандырган эле. Буга дейре анын жашап турган үйү толугу менен өрттөнүп кеткендиктен, ага мамлекеттик казынадан 450 миң сом акча ажыратылды. Атайын сертификатты Мамлекеттик камсыздандыруу уюмунун Жалал-Абад облусундагы филиалынын директору Бекжан Султангазиев тапшырды. Муну менен катар турак жайы өрттөнгөн Сузак районунун Ленин Айыл Өкмөтүнүн Жыгач-Коргон айылынын дагы бир тургуну Күмүшбек Кулчиевге дагы 250 миң сом ыйгарылды. Каражат камсыздандыруу тартиби эске алынган шартта гана төлөнүп берилди.

Ошентип, Мамлекеттик камсыздандыруу Уюмуна Жалал-Абад облус боюнча 2021-жылдын беш айында 4 миң 399 турак жай камсыздандыруудан өткөн. 2016-жылдан тарта ар түрдүү кырсыктар катталган 86 үйдүн калыбына келтирүү иштерине 9 миллион 74 миң сомдон ашуун каражат төлөнүп берилди. 

Алишер Токсонбаев