1,161 Бардыгы /

БАТКЕН. Баткен облусуна ушул жылдын аягына дейре өзгөчө макам ыйгарылат. Бул жөнүндө маалымат жыйынында Айыл, суу чарба жана аймактарды өнүктүрүү министрлигине караштуу Аймактарды өнүктүрүү мамлекеттик агенттигинин директорунун орун басары Эрмек Бахавидинов жар салды.

Анын айтымында, өзгөчө макам облустук администрациянын ыйгарым укуктарын абдан кеңейтет, ошондой эле Президенттин облустагы Өкүлүнө министрлер кабинетинин төрагасынын орун басары макамы дагы кошо ыйгарылат: – Мындан тышкары Баткен облусунда өзгөчө инвестициялык жана салыктык режим киргизилет. Ошондой эле аймактын социалдык-экономикалык абалын жакшыртуу жаатында Кеңеш дагы түзүлөт. Бул орган аймакты өнүктүрүү Программасын бекитет. Аталган мыйзам долбоордун алкагында Баткен облусуна жыл сайын өлкөбүздөн бюджетинен 500 миллион сом ажыратылат. Ушул тапта Баткен облусун өнүктүрүү Программасын иштеп чыгуу боюнча жумушчу топ түзүлдү. Ал жакын арада министрлер кабинетине аймакты өнүктүрүү боюнча Программасын тапшырат.

Деген Эрмек Бахавидинов Кыргыз-Тажик чек арасындагы жаңжал маалында өрттөнгөн 140 үй мамлекет тарабынан калыбына келтирилип жаткандыгын дагы кошумчалады: – Жаңжалдын жүрүшүндө жапа чегишкен 76 ишкерге 15 млн сом көлөмүндө жардам көрсөтүлдү. Бийлик тарабынан аларга жеңилдетилген насыялар дагы бериле баштады. Мындан тышкары аймакта жабыркаган социалдык объектилер, мунун ичинде 5 мектеп, 2 бала бакча жана 1 саламаттык сактоо уюуму калыбына келтирилүүдө. Баткен шаарында жакындарынан айрылгандарга дагы 36 турак жай курулууда.Жакында алар ээлерине пайдаланууга тапшырылмакчы.

Баса, Кыргыз-Такжик чек ара жаңжалында 140 үй, сегиз социалдык объект өрттөлгөн. Мунун кесепетинен 76 ишкер абдан катуу жабыркаган.

Алишер ТОКСОНБАЕВ