1,641 Бардыгы /

БАТКЕН. Лейлек районунун карамагындагы Катта-Туз аймагындагы Кыргыз-Тажик чек арасында Тажик чек арачылары казган аң жана Максат айылына жакын курулуп жаткан тосмонун курулушу токтотулуп, казылган аң толтурулду. Бул жөнүндө Президенттин Баткен облусундагы ыйгарым укуктуу Өкүлү Абдыкарим Алымбаев билдирди.

Маалыматка караганда, Президенттин Баткен облусундагы ыйгарым укуктуу Өкүлү Абдыкарим Алымбаев Кыргыз-Тажик чек арасындагы аң казуу аракеттерин токтотуу жана башка чек арага жакын аймактарындагы Тажик тараптын жүргүзүп жаткан курулуш иштери боюнча Тажикстандын Согдий облусунун аткаруу бийлигинин төрагасы Ражаббой Ахмадзода менен телефон аркылуу ачык сүйлөштү. Жакын арада Баткен жана Согдий облустарынын башчылары баштаган эки тараптын күч түзүмдөрүнүн жетекчилеринин жолугушуусу дагы күтүлүүдө.

Ал эми буга дейре ушыл жылдын 11-августунда Лейлек районунун Интернационал айылдык ооруканасына Тажикстан тараптан ок атылган. Мунун кесепетинен экинчи кабаттын терезеси талкаланып, окуя болгон жерде 5,45 мм калибрдеги “АК-74” автоматынын огу дагы табылган. 12-августтагы облустук жыйында Арка айылындагы Катта-Туз мунай куурлары жайгашкан жерде Тажикстандын куралдуу күчтөрү аскердик окопторду казып алганы дагы ачык айтылган.

Ошондой эле Катта-Туз аймагынан Тажикстан 1974-жылдардан бери мунай өндүрүп келген. Аймак Кыргызстанга 1992-жылы эле өтүшү керек болчу. Бирок, Тажикстан 1980-жылдары түзүлгөн макулдашуу менен кийин дагы иштетип турган. 2013-жылы Кыргыз чек арачылары Тажикстандын мунай өндүргөн мекемесин Кыргызстанга таандык аймактан чыгарып жиберген.

Алишер ТОКСОНБАЕВ, өз кабарчы