1,155 Бардыгы /

          БАТКЕН. Башкы прокуратура Баткен облустук суу чарба башкармалыгынын кызмат адамдары тарабынан мамлекетке ири өлчөмдө зыян келтирилгендиги тастыкталгандыгын шардана кылды. Анткени, Баткен районунун Көк-Таш айылындагы “Головной” суу бөлүштүргүч жайын оңдоп-түзөө жана ага тийиштүү тетиктерди сатып алуу үчүн жарыяланган тендерде жумуш аткаруучуларга мыйзамсыз түрдө 1,6 миллион сом которушкан. Алар мамлекеттик сатып алуулардын талаптарын одоно түрдө бузушуп, өз кезегинде аталган объектиде оңдоп-түзөө иштерин дегеле аткарышкан эмес.

Мындан тышкары Баткен районунун Ак-Сай жана Капчыгай насостук бекеттерин куруу боюнча тендерди өткөрүүдө дагы жооптуу кызматкерлер тендерде көрсөтүлгөн кызматтар үчүн абдан жогорулатылган бааны сунуштаган тарапты гана жеңүүчү деп табышкан. Мунун кесепетинен мамлекеттен кеткен ашыкча чыгым 602 503 сомду түзүп олтурат. Буга улай  аталган башкармалыктын кызматкерлери 651 396 сомду сый акы жана жумушчу сапар чыгымдары катары мыйзамсыз чыгышташып, ал каражаттарды дагы андан ары өздөрүнө сиңирип алышкан. Ошентип, шылуун  кызматкерлердин мыйзамсыз аракеттеринен улам мамлекетке жалпы жонунан 2 916 880 сом өлчөмүндө зыян келтирилген.

Баса, Баткен районунун Ак-Сай Айыл Өкмөтүндөгү “Головной” суу бөлүштүрүүчү бекети – стратегиялык аймак. Ошондуктан, ал Ички иштер министрлигинин атайын кайтаруусунда гана турат. “Головной” тилкесинде Тажик тарап ушул жылдын 28-апрелинде электр мамыларына видео камераларды орното баштагандыктан, Кыргыз-Тажик чек арасындагы куралдуу жаңжал “Головнойдо” андан ары тутанган.

Алишер ТОКСОНБАЕВ, өз кабарчы