2,280 Бардыгы /

Бүгүн, 20-август күнү, областтык Барпы драм театрынын атындагы аянтта республикалык ири масштабдагы кол өнөрчүлөрдүн жана дизайнерлердин республикалык фестивалы өттү. Ага өлкө аймагынан келген 60ка жакын кол өнөрчү ууз чеберлер, 40тан ашуун дизайнерлер катышып, өздөрүнүн эмгектерин тартуулашты.

Фестивалга Кыргыз Республикасынын Министрлер кабинетинин төрагасынын орун басары Жылдыз Бакашова, Президенттин Жалал-Абад облусундагы ыйгарым укуктуу өкүлү Абсаттар Сыргабаев, Маданият, маалымат, спорт жана жаштар саясаты министринин орун басары Салтанат Аманова, облустагы район-шаар башчылары жана тургундар катышты.

Саамалык Эгемендүүлүктүн 30 жылдыгынын алкагында Кыргыз элинин улуттук баалуулуктарын даңазалоо, кол өнөрчүлүк – көркөм искусствону жайылтуу болуп саналат.

Салтанатта сөз сүйлөгөн Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, бул көрүлүп жаткан аракеттер мамлекетибиздин көз карандысыздыгынын 30 жылдыгынын алкагында, тургундарыбызга майрамдук көтөрүңкү маанай тартуулоо менен элибиздин улуттук баалуулуктарын даңазалоо, аны баркын жаш муундарга сиңирүү болуп саналаарын белгиледи.

“Кыргыз оймолорунун мааниси талыкпай изденүүнү, көп түйшүктү талап кылат.  Ал өзүнө терең философияны камтып, андагы ар бир оймодо акылман Кыргыз элибиздин тарыхы, бүгүнкү күнгө чейин басып өткөн жолун чагылдырып турат. Жыл өткөн сайын улуттук колориттерибиз болгон кооз оймолор дүйнө элдеринин да кызыгуусун жаратып келет.  Бул албетте бизди кубандырат. Бүгүнкү Жалал-Абад жергесинде өтүп жаткан “Алтын өрөөн” республикалык фестивалы Кыргызстандын кол өнөрчүлүк тармагын дагы да өнүктүрүүгө чоң салым кошот деген  ишеничтебиз”,-деди ыйгарым укуктуу өкүл А. Сыргабаев.

“Алтын өрөөн” республикалык фестивалы театралдаштырылган көрүнүштөр, улуттук кийимдердин мода көргөзмөсү менен коштолду. Уюштуруу иштерине облустук өкүлчүлүк тарабынан 70 миң сомдон ашуун акча каражаты бөлүнгөн. Фестивалдын соңунда Маданият, маалымат, спорт жана жаштар саясаты министрлиги тарабынан 35 катышуучуга ыраазычылык барактары, облустун ыйгарым укуктуу өкүлчүлүгүнөн 20 кол өнөрчүгө дипломдор тапшырылды.

WWW.