984 Бардыгы /

БИШКЕК. Кыргыз Республикасынын УКМКсына караштуу Чек ара кызматынын коомчулук жана ЖМКлар менен байланыш бөлүмү социалдык тармактарда “Кыргызстанга дагы Ооганстандан качкындар келип жатышат” деген маалымат чындыкка дал келбестигин билдирди. Анткени, Кыргызстандын Ооганстан менен чектеш бир дагы чек арасы жок.

Ошого карабастан Кыргыз Республикасынын УКМКсына караштуу Чек ара кызматы Ооганстанда соңку тапта жүрүп жаткан окуяларга жана аны менен чектеш жайланышкан Тажикстан, Өзбекстан жана Түркмөнстандын чек ара аймактарындагы кырдаалга дагы дыкаат көз салууда.  Мындан тышкары УКМКнын Чек ара кызматы коңшулаш мамлекеттердин Чек ара өкүлчүлүктөрүнүн аппараттары менен ар тараптын кызыкчылыгын көздөгөн маалымат алмашуу маселелери боюнча адагы аракетин абдан активдештирди.

Баса, Кыргызстандын мамлекеттик органдары жана күч түзүмдөрү менен  кокусунан мамлекеттик чек арадагы жагдай курчуп кетсе, өз ара чогуу-чараан аракетте болуунун механизмдери жана биргелешкен аракет көрүүнүн жол-жобосу дагы эбак иштелип чыккан.

Ошол себептүү коопсуздукту туруктуу камсыздоо максатында  Кыргыз-Тажик жана Кыргыз-Өзбек мамлекеттик чек ара тилкелеринде убактылуу чек ара бекеттери коюлуп, Кыргыз Республикасынын УКМКсына караштуу Чек ара кызматы башка күч түзүмдөрү менен биргеликте пландаштырылган чалгындоо-издөө аракеттерин дагыле ырааттуу улантууда.

Алишер ТОКСОНБАЕВ, өз кабарчы