1,578 Бардыгы /

ОШ. Ош шаар мэринин милдетин аткаруучу Алмаз Мамбетов шаардагы №3-Ломоносов атындагы мектеп-гимназиясына кошумча салынып жаткан 500 орундуу имараттын курулушуна атайын баш багып, анда аткарылган иштерди жеринде көрүп кайтты.

Баса, аталган курулуштун тендерин “Бекстрой плюс” компаниясы утуп алган, 2016-жылдын 4-кварталында курулуш башталган. Ош шаар мэринин милдетин аткаруучу Алмаз Мамбетов аталган компаниянын жетекчилиги менен дагы жолугушуп, толук кандуу иш жүрбөй, курулуш токтоп калгандыгына байланыштуу 15-сентябрга окуучуларды кабыл алуу үчүн курулуш иштерин бүтүрүү талабын коюп, буга мөөнөт дагы берди. Ал эми айланасын көрктөндүрүү-жашылдандыруу, ирээтке келтирүү жараянын октябрга чейин бүтүрүү тапшырмасын дагы катуу эскертти.

Белгилей кетчү жагдай: Ош калаасындагы №3-Ломоносов атындагы мектеп-гимназиясына кошумча курулуп жаткан 500 орундуу имараттын курулушу республикалык бюджеттен каржыланып жатат.

Алишер ТОКСОНБАЕВ, өз кабарчы