1,005 Бардыгы /

Өзгөн районунда жашы жете элек өспүрүм бир айга жакын убактыттан бери убактылуу кармоочу жайда жатат.

Кыргызстандын кыйноолорду жана башка катаал, адамкерчиликсиз же кадыр-баркты басмырлаган мамиленин жана жазанын түрлөрүн алдын алуу боюнча Улуттук борбордун (КР КАУБ) Ош облусундагы өкүлчүлүгүнүн кызматкерлери 20-августта Өзгөн районундагы ИИБнүн убактылуу кармоочу изоляторлоруна атайын кароо иши менен барышкан.

Текшерүүнүн жыйынтыгы боюнча, КР КАУБ өкүлдөрү анда кармалгандардын кармоо шартында мыйзам бузуулардын бар экендигин аныкташты.

Эксперттердин маалыматына караганда, изолятордогу камерада төрт адам отурат. Мыйзам боюнча, ар бир адамга таандык санитардык аянттын өлчөмү 3,25 чарчы метр болушу керек, бирок иш жүзүндө бир адамга 2,30 чарчы метр гана бөлүнгөн.

Мындан тышкары, “камакта кармоо тартиби жана шарттары жөнүндө” мыйзамдын 9 -беренесине ылайык, жашы жете электерди камакта кармоо мөөнөтү 10 күндөн ашпоого тийиш болгонуна карабай, жаш өспүрүм К. уулу Н. камерада 25 күндөн бери отурат. 

Убактылуу кармоочу изоляторлордун санитардык абалы талаптарга жооп бербейт. Мекеме кир. Эрежелерге ылайык, дубалдын бети жылмакай болушу керек болгонуна карабай, “шуба кийгизилип” шыбалган. Бөлмөлөрдө дезинфекциялык чаралар ушул жылдын 16 -июнунан бери жүргүзүлгөн эмес.

Мыйзам бузуу фактылары боюнча КР КАУБнын Ош облусундагы өкүлчүлүгүнүн кызматкерлери акт түзүшти, эми ал тиешелүү органдарга тасир этүү үчүн жөнөтүлмөкчү.