819 Бардыгы /

Ахмат Масуд талибдерге каршы көтөрүлүшкө чакыргандан кийин 6-сентябрда Ооганстандын бир катар шаарларында нааразылык акциялар өттү.

Демонстранттар Улуттук каршылык фронтун колдогон, Пакистан менен “Талибанга” каршы ураандарды айтышты.

Соцтармактарда жарыяланган видеолордо кишилер Кабул, Мазари-Шариф, Герат шаарларында көчөгө чыгып, “Каршылык фронту жашасын”, “Пакистанга өлүм” жана “Аллаху Акбар” деп ураан чакырып жүрүшкөнүн көрүүгө болот.

Бул арада Панжшер капчыгайында каршылык фронту менен талибдердин салгылашы уланууда.

Улуттук каршылык фронтунун лидери Ахмад Масуд дүйшөмбү күнү айыгышкан салгылашуудан кийин ооган элине кайрылып, “Талибан” кыймылына каршы биригүүгө чакырган.

“Талибандын кечээки кол салуусунан кийин талибдердин тарабында ооган элине каршы чет өлкөлүк аскерлер көп жылдан бери жана азыр да күрөшүп жатканы белгилүү болду” деген ал.

Жекшембиде Панжшердеги Улуттук каршылык фронтунун позицияларына согуштук тик учактар жана учкучсуз аппараттар бомба таштаган. Фронттун расмий өкүлдөрү буга Пакистан армиясы менен чалгыны жардам бергенин билдирген. “Талибандын” расмий өкүлдөрү менен Пакистан бул боюнча комментарий бере элек.

“Талибан” кыймылы Ооганстандын түндүк-чыгышындагы Панжшер провинциясына толук көзөмөлүн орнотконун билдирген. Бирок бул маалыматты аймактагы талибдерге каршы турган “Ооганстандын улуттук каршылык көрсөтүү фронту” четке каккан.

WWW.