1,542 Бардыгы /

БИШКЕК. Ички иштер министрлиги ушул тапта абакта жаткан милициянын генералы Курсан Асановдуку делген аудио боюнча башка экспертиза дайындайт. Бул тууралуу аталган министрликтин басма сөз кызматынан билдиришти.

Ички иштер министрлиги басма сөз кызматынын билдирүүсүнө ылайык, Курсан Асановдун адвокаттары өткөргөн экспертизалар кылмыш ишинде далил катары эсептелинбейт. Анткени, бул экспертиза башка материалдарды салыштыруу менен өткөрүлгөн эмес.

• Тергөө жаңы лингвистикалык жана үн экспертизасын дайындоону

 караштырып жатат. Эксертизаны өткөрүүнү салыштыруу материалдары менен кошо мамлекеттик тийиштүү органдарга тапшырылат, – деп кошумчалады Ички иштер министрлиги басма сөз кызматынын өкүлү.

Ал эми Курсан Асановдун жактоочусу Чынара Жакупбекова ушул жылдын 6-октябрында социалдык тармакка таратылган Курсан Асанов менен Алмаз Сарыбаевдин сүйлөшүүсү делген аудиону Орусиянын жана Казакстандын эки экспертизасы монтаждалган деп тыянак чыгарып бергендигин билдирген. Анткени, ушул жылдын 7-октябрында Жогорку Кеңеште Курсан Асановдун үнү делген аудио тууралуу маселе көтөрүлүп, депутат Мурадил Мадеминов аудиону монтаждоого күч органдарын айыптаган.

Айтмакчы, ушул жылдын 14-сентябрында Ички иштер министрлиги Курсан Асанов “Башка адамдар менен бирге алдын ала сүйлөшүп, бийликти күч менен басып алууга активдүү даярданып, уюштуруп жүргөн” деген шек менен Жазык кодексинин 309-беренесинин (“Бийликти күч менен басып алуу”) негизинде шектүү катары кармаган. Анын алдында интернетте Асанов менен Сарыбаевдин телефондон сүйлөшкөнү делген аудио тараган. 15-сентябрда Алмаз Сарыбаев дагы кармалып, Биринчи май райондук сотунун чечими менен эки айга камакка алынган.

Ушул жылдын 16-сентябрында Курсан Асанов Бишкектин Биринчи май райондук сотунун чечими менен Ысык-Ата районунун Төмөнкү Нооруз айылындагы №50 тергөө абагына эки айга камалган. Асановдун жактоочулары аталган №50-колонияда өтө оор кылмыш жасагандар гана отураарын, 2015-жылы абактагылар күзөт кызматкерлерин өлтүрүп качып кеткен окуя ошол жерде болгондугун айтышып чырылдап келатышат.

Ошентип, Курсан Асановго буга чейин козголгон үч иш бириктирилип, Бишкектин Биринчи май райондук сотунда каралууда. Быйыл январь айында ага 2020-жылдын октябрындагы окуяларга байланыштуу “Имаратты жана мекемени басып алуу” деген берене боюнча айып тагылган. Анда Курсан Асанов алгач камалып, кийин үй камагына чыгарылган эле..

 Алишер ТОКСОНБАЕВ, өз кабарчы