1,638 Бардыгы /

ЖАЛАЛ-АБАД. Жалал-Абаддын Сузак айыл өкмөтүнүн имаратында чыккан өрттүн кесепеттери иликтенип жатат.

Алдын ала версиялар боюнча кимдир бирөөлөр тарабынан өрт коюлушу мүмкүндүгү айтылат. Ички иштер органы толук иликтенип бүткөн соң гана себеби белгилүү болот. Өрттүн кесепетинен айыл өкмөттүн 2016-жылдан бери архивдик документтери жана буйруктары күлгө айланган.
2 кабаттуу Сузак айыл өкмөтүндөгү өрт 10-октябрдын таңында, саат 7 менен 8дин ортосунда жүз берген. Имараттын биринчи кабаты толугу менен күйүп, аны өчүрүп калууга мүмкүн болгон эмес. Өрт каптаган имараттан Сузак райондук өрт өчүрүү бөлүмү 1 чакырым аралыкта жайгашкан, аларга да жалын алоолонуп тутанган убакта гана кабар берилген. Бирок өрттү дароо басууга кеч болуп калган эле. Өчүрүүгө Жалал-Абад шаарынан да кошумча күчтөр тартылган. Жергиликтүү тургундар да жардам беришти.
Алдын ала версиялар боюнча өрт имараттын бурчундагы көмүр сактаган кампадан тутанган деп айтылууда. Бирок айыл өкмөттүн кызматкерлери ага ишене албай турушат. Алардын пикиринде жалын архивдик документтер сакталган, жыйындар өтүүчү чоң залдын сахна тарабынан чыккан. Анткени өрттөн улам имараттын ошол бөлүгү көбүрөөк күлгө айланганын көрүүгө болот.
Эки кабаттуу бул имарат 1977-жылы коммунизм колхозунун кеңсеси катары салынган. Сузак айыл өкмөтүнүн аппараты 2011-жылдан тартып ушул жерде иштеп келишкен. Өрттүн кесепетинен айыл өкмөт имаратынан биринчи кабаты толук күйүп, экинчи кабаты ышка толгон. Мындан сырткары 2016-жылдан берки архивдик документтер да өрттөлгөн.
Кошумчалай кетсек, Сузак айыл өкмөтүнүн айланасында мурунку жана азыркы жетекчилер ортосунда талаш-тартыш болуп келген. Өрттүн кесепетин ошол жагдайга байланыштыргандар да бар. Атүгүл айыл өкмөт башчысы да муну айрым маалымат булактарына быйыштаган эле.

Бүбүсара ОРОЗАЛИЕВА, “Аймак”