960 Бардыгы /

ЖАЛАЛ-АБАД. Жалал-Абад шаардык мэрия тарабынан таштандыга акы төлөөдөн качып, таштандыларын өрттөгөн Аль-Мадина (Адилет) базарына айып пул салынды.

Жалал-Абад шаарындагы “Аль-Мадина” (Адилет) базарынан чыккан таштандылар базардын чок ортосунда күн-түн дебей, атайын меште өрттөлүп жок кылынат. Өрттөн чыккан түтүн, жагымсыз жыт базардын айланасында жашаган  жашоочулардын нааразычылыгын жаратты.

Алар жергиликтүү бийликке маселени чечип берүү боюнча кайрылып, жыйынтыгында Жалал-Абад шаардык мэриянын санитардык-экологиялык инспекциясы шаардын тазалыгын сактабаган жана экологияга зыян келтирип жаткан базар жетекчилигине карата 23 миң сом айып пул салды.

“Жалал-Абад Тазалык” муниципалдык мекемесинен билдиришкендей, шаардагы “Борбордук базар” таштанды үчүн ай сайын 100 миң сомго чукул акча каражатын төлөйт.  Ал эми “Аль-Мадина” базары таштандыга акы төлөбөөнүн амалы катары бир топ убакыттан бери таштандыларын өрттөп келген.