1,473 Бардыгы /

Алматынын Алмалык райондук сотунда соцтармактарга бийликтеги “Нур Отан” партиясын сындаган билдирүүлөрдү жазгандан кийин соттолгон активист Алнур Ильяшевдин доо арызы карала баштады.

Активист аны “түздөн-түз саясий репрессияга кабылган адам” деп таанууну талап кылууда.

Отурум башталганда Ильяшев төрагалык кылып жаткан судья Жомарт Аскаровго ишенбөөчүлүк көрсөтүп, аны алмаштырууну талап кылды. Өз кезегинде Аскаров бул боюнча доогер арыз жазса болорун билдирди.

«Ушул жылдын ичинде эле судья Жомарт Аскаров процессуалдык жол-жоболор сакталган эмес деген шылтоо менен үч арызымды негизсиз артка кайтарды — эки жолу саясий репрессия боюнча жана бир жолу айлык акы өндүрүү боюнча», — деди Ильяшев.

Бул иш боюнча угуулар судьяны чакыртып алуу арызы каралганга чейин кийинкиге жылдырылды.

2020-жылы июнда “өзгөчө абал учурунда жалган маалымат таратты” деп айыпталган Ильяшевдин эркиндиги үч жылга чектелип, 300 саат коомдук жумуштарды аткарууга милдеттендирилген. Ал ага чейин соцтармактарга бийликтеги “Нур Отан” партиясынын коррупциялык иштерин сындап, коронавирус пандемиясына каршы күрөшүүдөгү иш билгисиздиги боюнча пикирин жазган.

Ильяшев ага каршы козголгон кылмыш ишин “саясий репрессия” деп таанууну талап кылууда. Июнь айында Алмалык районундагы ушул эле сот активисттин арызын кабыл алуудан баш тарткан. Сот өз чечимин Ильяшев өз дооматтарын ырастаган документтерди көрсөтпөгөнү менен түшүндүргөн. Активист Алматынын апелляциялык сотуна кайрылып, биринчи баскычтагы соттун чечимин жокко чыгарып, ишти райондук сотко кайтарууну өтүнгөн.

Сентябрда Алматынын апелляциялык соту бул даттанууну канааттандырган.

Бир катар эл аралык укук коргоо уюмдары Казакстандын бийлигин Ильяшевге карата козголгон кылмыш ишин токтотууга чакырышкан. Өткөн жылы Amnesty International уюму саясий көз карашын билдиргени үчүн гана камакка алынган адам катары Ильяшевди “абийир туткуну” деп тааныган. Human Rights Watch уюму активистке каршы козголгон кылмыш ишин токтотуп, аны эркиндикке чыгарууну талап кылган.

WWW.