1,401 Бардыгы /

Орусия бийлиги келерки жылдын 31-январынан тартып өлкөдө үч жылдан ашык убакыттан бери жүргөн АКШ элчилигинин кызматкерлерин чыгып кетүүгө буюрду. Бул тууралуу шаршембиде Орусия ТИМинин атайын өкүлү Мария Захарова билдирди.

Москва бул чечими менен Вашингтондун орус дипломаттарынын АКШ аймагында жүрүү мөөнөтүнө киргизген чектөөсүнө жооп кайтарды.

Захаров билдиргендей, бул Орусиянын тандоосу эмес – “мындай оюнду АКШ таңуулады”.

Буга чейин Вашингтон 2022-жылдын 30-январына чейин Кошмо Штаттардан 27 орус дипломатынын чыгып кетишин талап кылган.

АКШнын Москвадагы элчилиги бул жагдай боюнча комментарий бере элек.

“РИА Новости” жазгандай, 2020-жылы АКШнын Мамлекеттик департаменти бир тараптуу түрдө Орусиянын Вашингтондогу элчилигин жана Нью-Йорк менен Хюстондогу башкы консулдуктарынын кызматкерлеринин иш сапарына үч жылдык лимит киргизген.

“Келерки жылдын 1-июлуна чейин Вашингтон үч жылдык эрежесинен баш тартпаса жана компромисске барбаса, Мамлекеттик департаменттин орусиялыктар үчүн жарыялаган санына тете кызматкерлер өлкөдөн чыгарылат”, – деди Захарова.

Reuters билдиргендей, Владивосток жана Екатеринбургдагы консулдуктар жабылгандан кийин АКШнын Москвадагы элчилиги Орусияда иштеп жаткан жападан жалгыз америкалык дипломатиялык өкүлчүлүк болуп калды. 2017-жылдан бери америкалык дипломатиялык миссиянын кызматкерлеринин саны 1200дөн 120га чейин кыскарды. Алдыда дагы боло турган кыскартууларга чейин эле Вашингтон Москвадагы миссиясы “техникалык жактан” гана бар экенин, кадимки форматта иштөө мүмкүн болбой калганын билдирген.

WWW.