1,146 Бардыгы /

Аялдардын теннис ассоциациясы (WTA) шаршембиде кытайлык теннисчиси Пэн Шуайдын коопсуздугуна тынчсызданып, Кытай жана Гонконгдогу бардык мелдештерди токтотконун жарыялады.

Бир нече жума мурун Шуай кытайлык жогорку кызматтагы аткаминерди сексуалдык зомбулукка айыптагандан кийин эл алдына чыкпай калган.

Ассоциациянын башчысы Стив Саймон уюм азыркыга чейин спортчунун кайда экенин жана коопсуздугуна коркунуч жаралган-жаралбаганын билбей турганын айтты.

Саймон теннисчинин айыптоолорун ачык-айкын иликтөөгө чакырды.

Кытай бийлиги мурдагы вице-премьер Чжан Гаолини сексуалдык зомбулукка айыптаган спортчу коопсуз жерде экенин билдирүүдө. 21-ноябрда Пэн Шуайдын Бээжинде өткөн теннис мелдешине катышканы тартылган видео жарыяланган. Бирок журналисттер менен күйөрмандар аны менен жолуга алышкан эмес.

Пен Шуай ноябрь айынын башында аны Кытайдын мурунку премьер-министри Чжан Гаоли менен сексуалдык байланышта болууга мажбурлашканын социалдык тармактарга жазган. Андан соң ал эл алдына чыкпай калган.

Бул Кытай коммунисттик партиясынын жогорку жетекчилигинин өкүлү сексуалдык зомбулук боюнча биринчи жолу эл алдында айыпталган учур болуп калды.

Пэн Шуай – жуп рейтинги боюнча дүйнөдөгү мурдагы биринчи ракетка, WTA турнирлеринин бир нече жолку жеңүүчүсү. Ал 35 жашта. 2013-жылы Уимблдон, 2014-жылы Франциянын Ачык чемпионатында жеңүүчү болгон.

WWW.