1,332 Бардыгы /

Тажикстандын демократиялык партиясы президент Эмомали Рахмон Евразия экономикалык биримдигине (ЕАЭБ) кирүү өтүнүчү менен уюмга кайрылышы керек деп эсептейт. Партия бул маселени 27-декабрдагы саясий кеңешинин жыйынында талкуулап, ушундай чечимге келген.

Бүгүнкү күндө Эмомали Рахмон Орусияда жүрөт. 27-декабрда ал КМШга мүчө өлкөлөрдүн мамлекет башчыларынын бейформал жолугушуусуна катышуу үчүн Санкт-Петербург шаарына учуп кеткен.

Тажикстан президентинин басма сөз кызматы “Озоди” радиосуна саммитте бул маселе талкууланбаганын билдирди. Эмомали Рахмон Орусиянын президенти Владимир Путин менен сүйлөшүүлөрдү өткөргөн, бирок азырынча бул боюнча ЖМКларга расмий маалымат бериле элек.

Тажикстандын демократиялык партиясынын төрагасы Саиджафар Усмонзода парламенттин мүчөсү катары ал президент өлкөнүн ЕАЭБге кирүү маселесин чечишин каалап жатканын билдирди.

“Муну менен Орусияда иштеп жүргөн тажик мигранттарынын көптөгөн көйгөйлөрү да чечилет. Биримдиктин уставына ылайык, ага мүчө өлкөлөрдүн жарандары үчүн иш маселесинде Орусиянын жарандарыныкындай эле укуктар берилет. Алардан патент же иштөөгө уруксат алуу талап кылынбайт”, – деди Усмонзода.

Азырынча Тажикстан Евразия экономикалык биримдигине кошулуу тууралуу Орусиянын чакырыктарына “маселе изилденип жатат”, “мамлекет үчүн бардык тобокелдиктер менен артыкчылыктары бааланууда” деп гана кыска жооп берип келет.

Усмонзода эгер Тажикстан ЕАЭБге кирсе, биримдикке мүчө өлкөлөрдүн ортосундагы мамилелер, анын ичинде кыргыз-тажик чек арасындагы талаш жөнгө салынат деп эсептейт.

Орусия ЕАЭБ түзүлгөн 2014-жылдан бери Тажикстанды бул биримдикке кошулууга чакырып келет. Алгач Орусия, Беларус жана Казакстан мүчө болгон биримдикке кийин Кыргызстан менен Армения кирип кеңейген.

Ошол эле маалда эгер Тажикстан ЕАЭБге мүчө болуп кирсе, өлкө бюджети бажы төлөмдөрүнөн түшүп жаткан кирешелеринин 30% кол жуушу мүмкүн.

WWW.