1,194 Бардыгы /

Самаркандда 31-декабрда салтанаттуу түрдө ачылышы болгон жаңы тоннелдин дубалынан суу ага баштады.

4-январда соцтармактарда тоннелдин жамгыр жаагандан кийинки абалы тартылган видео жарыяланды. Анда дубалдан катуу суу агып чыгып жатканын көрүүгө болот.

Жергиликтүү басылмалар тоннель 2022-жылга белгиленген Шанхай кызматташтык уюмунун саммитине карата курулганын жазышкан.

​Тоннелдин ачылыш аземинде Самарканд облусунун башчысы Эркинжон Турдимов жергиликтүү курулушчулар салганына карабастан, тоннель маанилүү экенин айткан.

Башында долбоордун курулушу 67,73 миллиард сумга (6 млн доллар) бааланганы менен кийин ал 143 миллиард сумга (13 млн доллардан ашык) салынган.

Айрым басылмалар тоннель тендер өткөрүлбөстөн өкмөттүн токтому менен салынганын кабарлашты.

Бул арада “Өзбекстан темир жолдору” компаниясы тоннель майрамга карата толук бүткөрүлбөстөн ишке берилгенин билдирди.

“Майрам күндөрү негизги курулуш-монтаж иштери аяктаган, тоннель шаар жолдорундагы тыгынды азайтуу үчүн ачылган. Бирок көрктөндүрүү, суу кетирүү жана ирригация түйүндөрү боюнча иш уланууда”, – деп айтылат билдирүүдө.

Рудаки көчөсүндөгү жер алдындагы магистралдын жалпы узундугу 635 метрди, тоннелдин узундугу 120 метрди түзөт.

Тоннелди курган “Өзбекстан темир жолдору” компаниясы буга чейин Сардаба суу сактагычындагы техногендик катастрофа, Ташкент метрополитенинин Юнусабад линиясындагы трагедия жана Ташкент метросундагы көптөгөн алашемдиктер үчүн сынга кабылып келген.

WWW.