1,080 Бардыгы /

Түркмөнстандын мамлекеттик ЖМКлары Казакстанда төрт күндөн бери уланып жаткан нааразылык акцияларды чагылдырган жок. “Азаттыктын” түркмөн кызматы ошол эле маалда өлкө тургундары өз ара коңшу өлкөдөгү окуяларды активдүү талкуулап жатканын кабарлоодо.

Маалыматка караганда, Казакстандагы окуялар бул өлкөнүн Маңгыстау облусу менен чектешкен Түркмөнстандын Балкан облусунун тургундарынын арасында акыркы бир нече күндөн бери көп талкууланган негизги темалардын бири болуп калды. Алар өз ара сүйлөшкөндө өздөрүнүн социалдык көйгөйлөрүн миңдеген казакстандыкты көчөгө чыгарган көйгөйлөр менен салыштырып, эмнеге түркмөн жарандары өз нааразылыктарын билдирип, өкмөттөн жашоо шарттарын жакшыртууну талап кыла албай жатышканын талкуулоодо. Алардын айтымында, Түркмөнстанда да баалар жогорулап, калктын жашоо деңгээли төмөндөп жатат.

“Газ гана эмес күйүүчү май, азык-түлүк сыяктуу бардык товарлар менен кызматтар кымбаттады. Эки эсеге гана эмес, 3-5 эсеге, айрымдары 10 эсеге чейин кымбаттап кетти. Бирок бул социалдык көйгөйлөр калктын ачык нааразылыгын жараткан жок”, — деди Балкан облусунун тургуну.

“Түркмөндөр үйсүз жашап, балдары үчүн мектептер жок болуп, банкоматтардан акчасын ала албаса да унчугушпайт. Бирок түрдүү иш-чараларга же пахта теримге чыккыла десе үнсүз чыгышат. Эгер бүгүнкү курс менен эсептесек, мугалимдердин, дарыгерлердин айлыгы 35 доллар. Казактар бизден 10 эсе жакшы жашайт, бирок өз талаптарын айтып көчөгө чыгышты”, — деп кошумчалады ал.

“Азаттыктын” түркмөн кызматынын Лебап облусундагы кабарчысы өлкөнүн чыгыш аймагындагы тургундар да Казакстандагы окуяларды талкуулап жатышканын билдирди.

“Казакстандагы нааразылыктар тургундарга дем берип, алар “бала ыйлабаса эмчек жок” деген макалды эстешти. Адамдар нааразылык аркылуу өз укуктарын талап кылса өкмөттү алмаштырууга мүмкүн экенин түшүнө башташты”, — деп билдирген лебаптык тургундардын бири.

2-январда Казакстандын Жаңы-Өзөн шаарындагы суюлтулган газдын баасын арзандатууну талап кылган митингчилерди колдогон акциялар бир нече күндөн бери өлкөнүн ондогон шаарында уланып жатат. 5-январга караган түнү митингдер полиция менен кагылышуу жана мамлекеттик имараттарды бастырып кирүү менен уланды.

WWW.