867 Бардыгы /

Өзбекстандын президенти Шавкат Мирзиёев камактагы 63 кишиге мунапыс берүү тууралуу жарлыкка кол койду. Бул тууралуу “Өзбекстан 24” телеканалы кабарлады.

Президенттин жарлыгына ылайык, кылганына өкүнүп, түрмөдө отурган кезде реабилитация жолуна түшкөнүн көргөзгөн 44 киши эркиндикке чыкса, 19 адамдын камактагы мөөнөтү кыскартылат.

Телеканалдын маалыматында ырайым берилген адамдардын баары абакта отурганда түрдүү адистиктер боюнча кесиптерге ээ болуп, тиешелүү сертификаттарды алганы белгиленген.

Мындан тышкары эркиндикке чыккандарга бир жолку материалдык жардам бериле турганы кабарланды. Ошондой эле мамлекет аларга жумушка орношууга, бизнес ачуу үчүн насыя алууга, пенсиялык камсыздандыруу боюнча маселелерин чечүүгө жана ID-карталарды алууга көмөктөшөт.

Өзбекстанда буга чейинки мунапыс өткөн жылы декабрдын башында Конституция күнүнө карата жарыяланып, 182 кишиге ырайым берилген.

WWW.