1,929 Бардыгы /

ЖАЛАЛ-АБАД. 2021-жылдын 8-ноябрына караган түнү болжол менен саат 02:30 чамасында бет кап, кол каптарды кийишкен, алдын ала даярдалган таяктарды, белгисиз үлгүдөгү ок атуучу тапанча алган топ Ала-Бука районунунда жайгашкан кен казуучу ишканалардын бирине бастырып киришкен.

Жалал-Абад ОИИБдин басма сөз кызматынын маалыматына ылайык, кен казган ишкананын кароолчуларын таяктары менен уруп сабашып, алардын бирөөсүнө карай ок чыгарышып, бутуна учтуу нерсе менен сайып денесине залал келтиришкен. Бөлмөнүн ичинде жатышкан чет элдик жана кыргыз  жарандарын таяктары менен уруп сабашып, белгисиз үлгүдөгү ок атуучу курал менен коркутушуп, колдорун байлашып, жабырлануучулардын уюлдук телефондорун жерге чаап, талкалап, жараксыз абалга келтиришкен. Чет элдик жаранды коркутуп, чөнтөгүнөн 20 000 сом накталай акчасын алышкан. Алтын металы салынган бөлмөнүн айнегин бузуп киришип, интернет чачыратуучу (ВайФай роутер) аппаратын талкалашкан. Темир сейфтин ичинде сакталып турган салмагы 1 кг. 833 гр. алтын металын ачык түрдө тартып алышкан. Ишкананын короосунда токтоп турган “Митсубиши Делика” үлгүсүндөгү автоунаанын дөңгөлөктөрүн бычак менен жарышып, фараларын талкалашып, жанында токтоп турган “ТойотаЛендКрузер Прадо” үлгүсүндөгү автоунаасын айдап, окуя болгон жерден изин жашырып качып кетишкен.

Натыйжада кен казуучу ишканага жалпы суммасы 10 млн сомдон ашуун материалдык зыян келтирилген. Бул факты Ала-Бука РИИБдин КЖБРне Кыргыз Республикасынын Жазык кодексинин (2017-жылдагы редакция) 202-беренеси (Каракчылык) менен катталып, сотко чейинки өндүрүш иши ачылган.

Кыргыз Республикасынын ИИМдин Кылмыш иликтөө башкы башкармалыгынын, ИИМдин 7-башкармалыгынын, ИИМдин Маалыматтык технологиялар бөлүмүнүн ыкчам талдоо тобунун, Жалал-Абад ОИИБдин жана Ала-Бука РИИБдин Кылмыш иликтөө бөлүмүнүн кызматкерлери тарабынан жүргүзүлгөн ыкчам иш-аракеттердин натыйжасында кылмыш ишине шектелип, Ала-Бука районунун тургундары 1992-ж.т. Ч.Б., 1995-ж.т. Т.С. жана 1996-ж.т. М.Ж. кармалып, 2 айга убактылуу кармоочу жайга киргизилген.

Учурда бул факты боюнча Жалал-Абад ОИИБдин Тергөө кызматы тарабынан тергөө амалдары улантылып жатат.