909 Бардыгы /

Казакстан парламентинин 2-февралдагы жыйынында “элден уурдалган каражатты” чет өлкөлөрдөн кайтаруу жөнүндө сөз болду.

“Tax justice network уюмунун маалыматына караганда, акыркы 25 жылдын ичинде Казакстандан чет өлкөлөрдөгү офшорлорго 140-160 миллиард доллар чыгарылып кеткен. Бул сумма Казакстандын ички дүң өнүмүнүн бир жылдык көлөмү менен өлкөнүн тышкы карызына барабар”, — деди “Ак жол” фракциясынан депутат Максат Раманкулов.

Анын айтымында, айрым маалыматтар боюнча Казакстандын укук коргоо органдары акыркы беш жылдын ичинде капиталды мыйзамсыз чет өлкөгө чыгарып кетүү фактылары боюнча 200дөн ашык кылмыш ишин козгогон.

“Бирок өлкөгө олуттуу суммадагы каражат кайтарылганы тууралуу эч нерсе белгисиз. Биздин фракция ондогон жылдардан бери “Панама тизмеси”, “Бейиш досьеси” жана Швейцария банктарындагы казакстандык эсептер тууралуу маселелерди көтөрүп келет”, — деди Раманкулов.

Мындан тышкары ал коомчулукта “январь окуялары маалында олигархтар Казакстандан өздөрү гана качпастан, ири суммадагы каражаттарды да чет өлкөлөргө чыгарып кетишкен” деген сөздөр айтылып жатканын кошумчалады.

Казакстандын президенти Касым-Жомарт Токаев 21-январда бизнестин өкүлдөрү менен жолугуп, өлкө байлыгынын жарымына 162 киши ээлик кыларын айтып, январь окуяларына байлар менен жакырлардын ортосундагы “өтө чоң айырма” себеп болгонун белгилеген.

Бери дегенде эле 227 кишинин өмүрүн алган жыл башындагы кандуу окуялардан кийин Токаев “Казак калкына” деген фонд түзүлгөнүн билдирген. Фонддун администрациясы анын ишине 150 миллиард теңгеге (343 миллион доллар) чейин каражат тартуу пландалып жатканын билдирген.

Офшордук аймактардан алынган миллиондогон документтерди камтыган “Пандора кагаздарында” (Панама тизмеси) Казакстандын мурдагы президенти Нурсултан Назарбаевдин улуу кызы Дарига Назарбаева жана анын уулу Нурали Алиев жөнүндө да жазылган. “Бейиш досьеси” деген аталышка ээ болгон дагы бир документтер топтомунда жогорку кызматтарда иштеген эки казакстандыктын ысымы аталган. Бул документтерди Журналисттик иликтөөлөрдүн эл аралык консорциуму менен Коррупцияны жана уюшкан кылмыштуулукту иликтөө борбору 2017-жылы жарыялаган.

WWW.