1,185 Бардыгы /

Тажикстандын Жер башкаруу жана геодезия комитетинин башчысы Ориф Ходжазода Төрт-Көчө аймагындагы 275 метр тилке Тажикстанга таандык экенин, аны Кыргызстан символикалык баага 49 жылга ижарага алганын билдирди.

“Топографиялык топтун жетекчиси катары айтсам, бул тилке 2009-жылы Кыргызстанга символикалык баага 49 жылга ижарага берилген. 1924-1929-жылдардагы документтерге жана 1989-жылдагы паритеттик комиссиянын материалдарына ылайык, ал талашсыз Тажикстандын жери болуп эсептелет”, – деди Ходжазода 4-февралда Душанбеде өткөн басма сөз жыйынында.

Төрт-Көчө деп аталган 275 метрлик тилке аркылуу Ош-Баткен-Исфана трассасы жана Ворух анклавын Тажикстандын негизги аймагы менен байланыштырып турган жол өтөт.

Өткөн жумада президенттин Баткен облусундагы өкүлү Абдикарим Алимбаев аталган тилке укуктук статусу аныктала элек талаштуу жер экенин айткан. “Төрт-Көчө тилкеси азырынча эч кимге таандык эмес. Азыркы учурда Тажикстандын жарандары да, Кыргызстандын жарандары да колдонот. Чек ара бир тараптуу чечилбеши керек. Сөзсүз түрдө маселе эки тараптуу чечилет. Бүгүнкү күндө, тилекке каршы, тажик тарап Төрт-Көчө тилкесин Тажикстандын аймагы деп эсептөөгө аракет кылып жатат. Бирок мунун баары мыйзамсыз”, – деген Алимбаев.

Ориф Ходжазода чек араны тактоо боюнча эки өлкөнүн топографиялык топторунун кезектеги жолугушуусу жакынкы күндөрү өтө турганын кошумчалады. Анын айтымында, 2021-жылы тараптар 81 чакырым жерди такташкан. Ошол эле маалда Ходжазода бул тилкелер кайсыл жерде жайгашканын так айткан жок, бирок алар боюнча чечим 1924-1929-жылдардагы документтер жана 1989-жылдагы паритеттик комиссиялардын материалдарынын негизинде кабыл алынганын белгиледи.

Кыргызстан менен Тажикстандын чек арасынын жалпы узундугу 970 чакырымдай болсо, анын 519 чакырымы гана такталган. Чек аранын такталбаганы жер, суу, жайыт талаштан чыккан чатактарга себеп болуп келет.

WWW.