1,137 Бардыгы /

Тажикстандагы Исфара шаарынын бийлиги 27-январда кыргыз-тажик чек арасында болгон жаңжалдын болжолдуу чыгымы 1,5 миллион сомонини (133 миң доллар) түзгөнүн билдирди.

Мекеменин маалыматына караганда, алдын ала эсептөөлөр боюнча акыркы чек ара жаңжалында Чоркух жана Сурх айылдарында 52 турак үй зыянга учураган.

4-февралда Исфара акимчилигинин расмий өкүлү Зубайдулло Шомадов келтирилген материалдык чыгым боюнча акыркы маалыматты атайын түзүлгөн комиссия жарыялай турганын билдирди. Ал комиссиянын курамына облустагы мекеме-ишканалардын өкүлдөрү кирген.

Жергиликтүү бийликтин айтымында, чек ара жаңжалында үйлөрдөн тышкары ашкана, наабайкана, дүкөн сыяктуу объектилер зыянга учурап, электр зымдары үзүлгөн. Мындан улам Чоркух айылынын тургундары бир суткадан ашык убакыт электр жарыгысыз отурган.

Бийлик өкүлдөрү азырынча зыянга учураган үйлөр менен объектилер качан калыбына келтириле турганы боюнча эч кандай маалымат беришкен жок.

Өткөн жумада Баткен районунун акими Учкунбек Жоробаев чек арадагы соңку атышуунун материалдык чыгымы алдын ала үч миллион сом деп эсептелгенин билдирген. Анын айтымында, жаңжалда эки сарай өрттөлүп, бир нече үй жана эки машине талкаланган. Бодо мал уурдалган, өрттөнүп кеткен фактылар да катталган.

27-январда кыргыз-тажик чек арасындагы Төрт-Көчө аймагында тажик тургундар жолду бууганга аракет кылып, сүйлөшүүлөрдөн кийин абал тынчыган. Кыргызстандын Чек ара кызматы мындан көп өтпөй эле тажик тараптан башка аймакта – Чыр-Дөбөдө ок атылганын билдирген.

Кыргызстан муну тажик чек арачыларынын атайын жасалган чагымы деп атаган, тажик тарап Кыргызстанды айыптаган.

Кыргыз-тажик чек арасындагы атышууда жалпысынан 12 кыргызстандык жаран жабыркаган.

Тажикстандын “Ховар” маалымат агенттиги жаңжалда эки тажик жараны мерт болуп, дагы 10 адам жараат алганын, анын алтоо аскер, төртөө жайкын тургун экенин жазган.

WWW.